Кардынал Левада пра сексуальныя злоўжыванні: Касцёл мае абавязак супрацоўнічаць са
свецкім заканадаўствам
6 студзеня ў Рыме
ў Папскім Грыгарыянскім універсітэце пачаўся маштабны міжнародны форум, прысвечаны
тэме сексуальнага выкарыстання непаўналетніх. На ім сабраліся дзве сотні ўдзельнікаў
з усяго свету, прадстаўнікі біскупскіх канферэнцый і манаскіх кангрэгацый. Ініцыятарам
сустрэчы выступіла Кангрэгацыя Веравучэння, у кампетэнцыі якой знаходзяцца падобныя
правапарушэнні. Прэфект ватыканскай дыкастэрыі, кардынал Уільям Левада, заклікаў удзельнікаў
сур’ёзна паглядзець на гэту праблему ў рамках Касцёла. Ён узгадаў ліст Яна Паўла ІІ
“Sacramentorum sanctitatis” ад 30 красавіка 2001 г., у якім памерлы Пантыфік ясна
вызначыў цяжкасць падобнага злачынства. У далейшым Ян Павел ІІ і Бэнэдыкт XVI яшчэ
больш узмоцнілі існуючае заканадаўства, пастанавіўшы, што ў выпадках крайняй цяжкасці
трэба адмовіцца ад судовага разгляду справы сексуальнага выкарыстання непаўналетніх,
і, калі існуюць ясныя факты злачынства, кіраваць справу непасрэдна да Святога Айца
для звальнення злачынцы з духоўнага стану.
Кардынал Левада звярнуў увагу,
што ў падобных выпадках Касцёл павінен пачуць ахвяру і ўспрыняць яе сітуацыю з усёй
сур’ёзнасцю. Ён нагадаў, што Папа, падчас сваіх шматлікіх пастырскіх візітаў у Вялікабрытанію,
на Мальту, у Германію, Аўстраліі і Злучаныя Штаты, даў асабісты прыклад таго, як важна
прыслухоўвацца да ахвяраў. Прэфект Кангрэгацыі Веравучэння падкрэсліў важнасць адукацыі
бацькоў і саміх дзяцей адносна з’явы сексуальнага насілля ў грамадстве ў цэлым. Некаторыя
біскупскія канферэнцыі распрацавалі падобныя праграмы. Не меньш важнай з’яўляецца
адукацыя будучых святароў і кансэкраваных асоб. Кардынал звярнуў увагу, што асаблівая
ўвага павінна быць звернута на кандыдатаў да святарства, якія пераходзяць з адной
семінарыі ў другую або змяняюць дыяцэзію.
Ватыканскі іерарх падкрэсліў, што
“біскуп мае адказнасць за прадастаўленне адпаведнай матэрыяльнай падтрымкі святарам,
у тым ліку абвінавачаным або прызнаным вінаватымі ў сексуальным гвалце, у адпаведнасці
з нормамі кананічнага права”.
У заключэнні свайго выступлення на форуме кардынал
Уільям Левада звярнуў увагу на важнасць супрацоўніцтва Касцёла са свецкай адміністрацыяй
у расследаванні выпадкаў сексуальных злоўжыванняў. “Касцёл мае абавязак супрацоўнічаць
са свецкім заканадаўствам, што тычыцца паведамленняў аб такіх злачынствах ў адпаведныя
органы”. Але, з другога боку, як адзначыў прэфект Кангрэгацыі Веравучэння, святары
і біскупы павінны пазбягаць кампрамісаў, якія б датычылі “унутранага сакраментальнага
форуму, што павінен заставацца недатыкальным”.