Simpozium në Romë për shpërdorimet e kryera mbi të miturit nga klerikët: intervistë
me imzotin Shikluna.
“Drejt shërimit e përtëritjes” është titulli i simpoziumit ndërkombëtar, organizuar
nga Universiteti Papnor Gregorian, që do të mbahet në Romë më 6 deri më 9 shkurt.
Mblidhet me synimin për t’i krijuar Kishës mundësi të japë një përgjigje globale lidhur
me shpërdorimet seksuale, kryer nga anëtarë të klerit, e sidomos, për të mbrojtur
më mirë vetë të miturit. Parashikohet pjesëmarrja e delegatëve, ardhur nga 110 konferenca
ipeshkvnore dhe e eprorëve e përgjithshëm të më se 30 urdhërave rregulltare. Mbi qëllimet
e kuvëndimit, flet imzot Çarls Shikluna, promotor i drejtësisë pranë Kongregatës
për Doktrinën e Fesë, në mikrofonin tonë:
Përgjigje: - Para
së gjithash, ndërgjegjësimi: të kuptohet mirë problemi, fenomeni i trishtuar i shpërdorimeve
seksuale mbi të miturit nga ana e klerikëve; e pastaj, vendosmëria për të vepruar
drejt, që ne, si Kishë katolike, të japim edhe në këtë lëndë, kaq të vështirë, shembullin
e mirë, në përkim me misionin tonë ungjillor.
Pyetje: - Simpoziumi
do të vërë në plan të parë pikërisht viktimat e shpërdorimeve. Ç’mendoni për këtë
radhitje kaq domethënëse të problemeve?
Përgjigje: - Është
domethënës fakti që ndërhyrja e parë t’i kushtohet pikërisht njeriut të dëmtuar rëndë
nga ky realitet kaq i trishtuar, t’i kushtohet viktimës. Është thellësisht baritore
të mendosh së pari për gjithë njerëzit, që janë ngatërruar në këtë fakt, sa të turpshëm,
aq edhe tragjik; e edhe klerikët, që i dëmtuan kaq rëndë të tjerët, sepse ne jemi
Kishë dhe kemi detyrat e Bariut të Mirë; t’i gjejmë delet e humbura e t’i kthejmë
përsëri në kullotat tona, duke kërkuar edhe balsamin e nevojshëm për t’u shëruar plagët
e hapura.
Pyetje: - Simpoziumi do të ndihmojë për vënien në jetë
të direktivave të Letrës suaj, Letër e Kongregatës për Doktrinën e Fesë. Është fjala
për Letrën qarkore të majit 2011. Ç’tip kontributi do t’u sjellë Konferencave ipeshkvnore
të mbarë botës, të ftuara posaçërisht për ta aktualizuar këtë direktivë?
Përgjigje:
- Do të jetë pikërisht prefekti i Kongregatës për Doktrinën e Fesë, kardinali
Levada, që do ta hapë këtë simpozium, me një hyrje kushtuar shpërdorimeve seksuale
mbi të miturit. Natyrisht, do të flasë edhe për këtë Letër qarkore, e cila kërkoi
nga të gjitha Konferencat ipeshkvnore të përgatisin vijat udhëheqëse, që do të ndihmojnë
për t’i dhënë një përgjigje të përshtatshme, lidhur ngushtë me mjedisin e tyre kulturor,
këtij fenomeni kaq të trishtuar. Natyrisht në takim, përveç Kongregatës, do të japin
ndihmesën e vet edhe specialistë të ndryshëm, të ftuar për të folur, për të nxitur
reflektimin e edhe për të ndihmuar konkretisht me propozimet e tyre, që Kishat vendase
e urdhërat rregulltare t’i përgjigjen me sukses fenomenit të shpërdorimeve seksuale
mbi të miturit.
Pyetje: - Mund të na thoni diçka lidhur me përgjigjet
që i kanë dhënë deri më sot Konferencat ipeshkvnore të mbarë botës, kërkesës suaj
lidhur me hartimin e planeve baritore, për përballimin e shpërdorimeve?
Përgjigje:
- Mund të them se shumë presin përfundimin e këtij simpoziumi, për t’u
kthyer në atdhe e, si të kenë marrë disa informacione të posaçme, ta përfundojnë punën,
të cilën e di se disa prej tyre e kanë filluar. Kardinali ynë, për shembull, ishte
kohët e fundit në Amerikën Latine, pikërisht në Brazil, ndërsa unë isha në Tajlandë
për t’u takuar me ipeshkvijtë e Azisë. Pastaj, menjëherë pas përfundimit të simpoziumit,
delegatët e episkopateve anglishtfolëse do të takohen përsëri, për të diskutuar mbi
të njëjtën temë. Do të takohen edhe me mua e me përfaqësues të tjerë të Kongregatës
sonë. Prandaj mund të them se puna është në vijim. Në Kongregatë tashmë kanë arritur
edhe disa nga vijat udhëheqëse, të cilat specialistët tanë po i shqyrtojnë me vëmendje,
për t’i miratuar, pastaj, përfundimisht, ose për të kërkuar ndryshime e përmirësime,
pas majit të sivjetëm.
Pyetje: - Shërim, por edhe risim, përtëritje:
kjo do të thotë se do t’i kushtohet vëmendje e veçantë parandalimit, domethënë, informimit?
Përgjigje:
- Pa tjetër. Formimit, para së gjithash, të veprimtarëve baritorë: e kemi
fjalën për klerikët, por edhe për laikët e impenjuar si katekistë. E parandalimi duhet
të nisë nga baza: jo vetëm nga lart, por nga baza. E kjo është gjëja më e rëndësishme.
Sepse informimi duhet të shtrihet edhe në familje, në shkolla, në famulli. Si mund
të zbulohen sjelljet e rrezikshme? Si mund të ndihmohen djemtë e vajzat, të rinjtë,
të mbrohen nga qëllimet e liga të tjetrit? Këtyre pyetjeve duhet t’u japim përgjigje
konkrete.
Pyetje: - Sipas jush, ç’vlerë ka në këtë përpjekje parandaluese,
bashkëpunimi i dioqezave me autoritetet civile?
Përgjigje: -
Flasim për një fenomen tepër të trishtuar, që nuk është vetëm mëkat, por edhe krim.
E si krim, dënohet nga ligjet e shtetit. Prej këndej, detyra për të bashkëpunuar me
organet e drejtësisë penale.
Pyetje: - A mund të themi se simpoziumi
është një shenjë e re, që tregon qartë se Vatikani po lufton me vendosmëri kundër
pedofilisë në gjirin e Kishës? Përgjigje: - Po, por kjo është
edhe fryt i vendosmërisë së treguar vite më parë, nga i Lumi Gjon Pali II, i cili,
më 23 prill 2002, u pati thënë kardinajve amerikanë: “Nuk ka vend në shërbimin kishtar
për njerëz që mund të dëmtojnë e të shkandullojnë të rinjtë”. E pastaj, kujtoj edhe
udhëheqjen shumë të fortë të Atit të Shenjtë, Benediktit XVI, që i frymëzon të gjithë
të bëjnë ç’është e mundur, sa më mirë e sa më shpejt, për ta parandaluar fenomenin
e, atje ku janë hapur tashmë plagë, për t’i mjekuar me kujdes e dashuri.