Кс. Ігар Лашук: патрэбна адзінства паміж касцёльнымі ўладамі і манаскімі супольнасцямі
ў Беларусі
2 лютага, у свята Ахвяравання Пана, у Каталіцкім Касцёле адзначаецца Сусветны дзень
кансэкраванага жыцця, калі вернікі ўсяго свету моляцца за законнікаў і законніц,
людзей, якія цалкам прысвяцілі сябе служэнню Богу. У Беларусі, з нагоды гэтага свята,
таксама адбыліся ўрачыстыя сустрэчы і набажэнствы. Гаворачы аб праблемах манаскіх
супольнасцяў у нашай краіне, кс. Ігар Лашук, салезіянін, адзін з ініцыятараў стварэння
ў краіне Канферэнцыі кіраўнікоў манаскіх кангрэгацый, адзначыў, што сёння на стан
манаскага жыцця ўплывае распаўсюджаная спажывецкая культура, якая перашкаджае духоўнаму
жыццю. “У нас існуе ўсё менш і менш людзей, якія ідуць за Панам і хочуць быць святлом
для гэтага свету”, - адзначыў святар у інтэрв’ю нашаму радыё, гаворачы аб пакліканнях
да кансэкраванага жыцця. Кс. Ігар падкрэсліў, што феномен спажывецтва закранае таксама
і Касцёл, у якім чамусьці ўсё часцей больш увагі звяртаецца на працу, чым на малітву
і будаванне адносін з Богам. Святар выказаў шкадаванне з прычыны адсутнасці кантэмпляцыйных
манаскіх супольнасцяў у нашай краіне. “Асноўнай праблемай, якая мяне асабіста хвалюе
– гэта духоўная лянота. Мы шмат працуем фізічна, але ці маем час на тое, каб засяродзіцца
на Богу?”, - спытаў кс. Ігар.
“Пажадана, каб наш Касцёл аднавіўся духоўна.
Каб было больш адзінства паміж паміж касцёльнымі ўладамі і манаскімі супольнасцямі.
Гэта вельмі важна. Мы служым аднаму Богу і аднаму Касцёлу”, - сказаў святар.
Кс.
Ігар падкрэсліў, што, нягледзячы на цяжкасці, Касцёл у Беларусі дынамічна развіваецца.
Ён выказаў спадзяванне на рэалізацыю ініцыятывы па стварэнні Канферэнцыі кіраўнікоў
манаскіх кангрэгацый у Беларусі, якая ўзнікла яшчэ ў 2008 г. “Гэта дасць новы імпульс
жыццю манаскіх супольнасцяў у нашай краіне”, - падкрэсліў святар.