Папа выказаў спачуванні ў сувязі са мерцю кардынала Бэвілаквы

Бэнэдыкт ХVI скіраваў спачувальную тэлеграму на імя арцыбіскупа Філадэльфійскага ў ЗША Чарльза Чапута ў сувязі са смерцю 31 студзеня яго папярэдніка кардынала Энтані Бэвілаквы. Святы Айцец адзначыў заслугі памерлага ў галіне сацыяльнай справядлівасці і душпастырскай працы сярод эмігрантаў у ЗША. Папа нагадаў, што іерарх быў экспертам у пераглядзе нормаў кананічнага права пасля ІІ Ватыканскага Сабора.

Энтані Бэвілаква нарадзіўся ў 1923 г. у Нью-Ёрку ў сям’і італьянскіх эмігрантаў. Святарскае пасвячэнне прыняў у 1949 г. Вучыўся ў Папскім Грыгарыянскім універсітэце, дзе атрымаў тытул доктара кананічнага права. У 1983 г. бл. Ян Павел ІІ прызначыў яго біскупам Пітсбурга, а ў 1988 г. арцыбіскупам Філадэльфіі. На гэтай пасадзе кардынал Бэвілаква заставаўся да 2003 г. Падчас кансісторыі 28 чэрвеня 1991 г. Ян Павел ІІ надаў яму годнасць кардынала.