Benedikti XVI kujton presidentin Oskar Luigji Skalfaro.
“Burrë i ndritur katolik shteti”: kështu e kujton Papa Benedikti XVI Oskar Luigji
Skalfaron, president i Republikës italiane nga viti 1992 deri në vitin 1999, që vdiq
dje, në Romë. Në një telegram, drejtuar bijës së ish-presidentit, Papa shpreh ngushëllimet
më të ndjera, duke e kujtuar me nderim të thellë Burrin katolik të Shtetit, që u përpoq
për promovimin e së mirës së përbashkët e të vlerave të pandryshueshme etiko-fetare
kristiane, tipike për traditën historike e civile të Italisë. Nënshkruar nga Sekretari
i Shtetit të Vatikanit, kardinali Tarçizio Bertone, dy telegrame: njëri, së bijës
e tjetri, Presidentit italian Giorgio Napolitano. Në këtë të fundit i ndjeri kujtohet
si “shërbëtor besnik i institucioneve dhe si njeri i fesë”.
Duke vënë gjithë
jetën në shërbim të shtetit, Skalfaro qe anëtar i Asamblesë Kushtetuese të 1946-tës
si dhe dy herë ministrër e zëvendës-sekretar. Kryetar i Dhomës në prill 1992, u zgjodh
në Kuirinale një muaj më pas. Edhe atë Federiko Lombardi, drejtor i Sallës
vatikanase të Shtypit e i Radios sonë, i bën Burrit të madh të shtetit italian, një
homazh, të cilin e quan ‘personal e plot mirënjohje’: “Dëshiroj të kujtoj
vetëm dy aspekte të jetës e të personalitetit të Presidentit Skalfaro. Është njëri
nga përfaqësuesit e fundmë e të shquar të asaj breznie që, në lule të forcave, u impenjua
bujarisht për rindërtimin e vendit, në përfundim të tragjedisë së fashizmit e të luftës,
gjë që e bëri me pasion të madh ideal, me kthjelltësi kulturore e integritet moral,
si dëshmi e një impenjimi shoqëror e politik, që buronte nga një fe e thellë, e jetuar
ditë për ditë”.
Ndërsa vetë Skalfaro fliste kështu për rolin e Presidentit
të Republikës, e të Republikave: “Duhet të jetë brenda të gjithave, si impenjim.
Por duhet të jetë edhe përmbi të gjitha. E të jesh “përmbi” do të thotë të bësh të
gjitha përpjekjet, me kufizimet njerëzore, për të respektuar të vërtetën, domethënë
të mos u japësh të drejtë as miqve, kur nuk kanë të drejtë, e t’u japësh të drejtë
edhe kundërshtarëve, kur e kanë”. Në një intervistë dhënë Radios sonë prillin
e kaluar, Skalfaro pati theksuar: “Në të gjitha diskutimet, e janë
shumë, që kam me të rinjtë e jo të rinjtë, e përkufizoj kështu realitetin, në të cilin
jetojmë: ne jemi në mjerim të thellë, kulturor e moral. Por duhet të jemi plotësisht
të sigurtë se e vërteta do të fitojë mbi gënjeshtrën; e mira, mbi të keqen. Do të
vijojë akoma kjo vuajtje? Kam frikë se po, e megjithatë duhet ta kemi në shpirt sigurinë
absolute se në fund të fundit nuk do të fitojë e keqja, hipokrizia, e as kalbësira
e grumbulluar këto vite, edhe për shkak tonë”. U kremtua sot, në orën 14.00,
në Kishën romake të Shën Marisë në Trastevere, Mesha e dritës e Presidentit të nderit
të Republikës italiane, Oskar Luigji Skalfaro, që vdiq ndërmjet së shtunës e së dielës,
në moshën 93 vjeçare. Meshën e kryesoi imzot Vinçenco Palia, ipeshkëv i Ternit e atë
shpirtëror i Bashkësisë së Shën Egjidit.
Kujtojmë se emri i presidentit të
ndjerë Skalfaro nuk është i panjohur në Shqipëri, ku ishte për vizitë disa herë. Mori
pjesë edhe në përurimin e Qendrës Edukative Dom Bosko në Laprakë të Tiranës, pasi
kishte dhënë një ndihmesë jo të paktë për kalimin e Shqipërisë nga komunizmi, në demokraci.