Арцыбіскуп Зімоўскі: перамяніць праказу з пагрозы ў страшны ўспамін з мінулага
Арцыбіскуп Зыгмунт Зімоўскі, старшыня Папскай рады пастрыства работнікаў сферы аховы
здароўя, скіраваў пасланне з нагоды Сусветнага дня барацьбы з праказай, які будзе
адзначацца 29 студзеня. У самой тэме звароту гучыць заклік: “У барацьбе з праказай
неабходны уклад усіх людзей добрай волі”. Арцыбіскуп Зімоўскі нагадаў, што ў свеце
жыве больш за 200 тыс. чалавек, якія пакутуюць ад гэтай хваробы, таму існуе тэрміновая
патрэба ў “бесплатным распаўсюджванні неабходных медыцынскіх прэпаратаў, своечасовай
дыягностыцы і настойлівасці ў лячэнні”.
“Евангельскія словы “Устань, ідзі,
вера твая ўратавала цябе”, якія Бэнэдыкт XVI абраў тэмай свайго паслання на ХХ Сусветны
дзень хворых, з’яўляюцца зваротам да тых, каго асаблівым чынам закранула хвароба”,
- адзначыў іерарх. Ён падкрэсліў, што ў гэтым евангельскім фрагменце гаворка ідзе
аб 10 хворых на праказу, якія пасля аздараўлення Езусам, “вярнуліся ў супольнасць,
свой сацыяльны і працоўны кантэкст”.
Старшыня Папскай рады нагадаў, што Папа
звяртае ўвагу на важнасць веры для тых, хто пакутуе ад хваробы, а таксама ўпэўненасці
ў тым, што любоў Касцёла з’яўляецца працягам збаўчай місіі Езуса Хрыста. Акрамя таго,
іерарх адзначыў, што дзейнасць асобных людзей, касцёльных і валанцёрскіх супольнасцяў
у барацьбе з праказай, павінна падтрымлівацца таксама ўрадамі і міжнароднымі арганізацыямі.
Арцыбіскуп Зімоўскі падкрэсліў, што таксама тыя, хто быў аздароўлены і прайшоў
цяжкі шлях вяртання ў сацыяльны і працоўны кантэкст, могуць стаць сведкамі і дапамагаць
іншым праз маральную падтрымку, а таксама супрацоўніцтва з рознымі структурамі і ініцыятывамі.
“Толькі дзейнасць усіх і на ўсіх узроўнях дапаможа перамяніць праказу з пагрозы ў
страшны ўспамін з мінулага”, - адзначыў арцыбіскуп Зімоўскі.