Кс. Ламбардзі пракаментаваў абвінавачванні ў адрас дзейнасці ватыканскіх устаноў
Кс. Фэдэрыко Ламбардзі, кіраўнік Залі Друку Апостальскай Сталіцы і дырэктар Ватыканскага
радыё, адзначыў, што ў адказ на “цяжкія абвінавачванні”, якія прагучалі ў праграме
“Недатыкальныя” на італьянскім тэлевізійным канале “La7” вечарам 25 студзеня, Дзяржсакратарыят
Яго Святасці Бэнэдыкта XVI і Губернатарат дзяржавы Ватыкан “вымушаны прыняць усе неабходныя
законныя меры”, каб абараніць гонар асобаў, “якія маюць высокія маральныя якасці,
з’яўляюцца прызнанымі прафесіяналамі, а таксама служаць Касцёлу, Папе і супольнаму
дабру”.
Кс. Ламбардзі адзначыў, што ў праграме прысвечанай фінансавым пытанням,
дзейнасць Губернатарата Ватыкана, была прадстаўлена “фрагментарна і банальна, звяртаючы
ўвагу перш за ўсё на негатыўныя аспекты”. Ён назваў матэрыялы, прадстаўленыя ў праграме
“дэзінфармацыйнымі” і “прадузятымі”, якія не могуць паўплываць на “зацямненне” усё
большай празрыстасці ў дзейнасці ватыканскіх устаноў.