Selia e Shenjtë ratifikon disa Konventa të OKB-së kundër kriminalitetit
Me vendim të Papës Benediktit XVI, Selia e Shenjtë e Shtet Qyteti i Vatikanit kanë
ratifikuar dje disa Konventa të OKB-së kundër kriminalitetit e trafikut të paligjshëm
të substancave narkotike. Fjala është për Konventën ndërkombëtare mbi luftën kundër
financimit të terrorizmit, nënshkruar më 9 dhjetor 1999 në Nju Jork, për Konventën
kundër krimit të organizuar transkombëtar, nënshkruar më 15 nëntor 2000 në Palermo
2000, si edhe për Konventën kundër trafikut të paligjshëm të drogës dhe të substancave
psikotrope nënshkruar më 20 dhjetor 1988 në Vjenë. Kështu bënë të ditur Salla e Shtypit
e Selisë së Shenjtë duke nënvizuar se dje në selinë e Organizatës së Kombeve të Bashkuara
në Ju Jork, kryeipeshkvi Francis Assisi Chullikar, Vëzhgues i Përhershëm i Selisë
së Shenjtë, ka depozituar instrumentin e ratifikimit të Konvetës së parë e atë të
aderimit në dy tjerat. “Ky hap – nënvizon në notën shpjeguese e Sekretarit të Vatikanit
për Marrëdhëniet me Shtetet, imzot Dominik Mambertì – tregon vlerësimin e Selisë së
Shenjtë për impenjimin e bashkësisë së shteteve në parandalimin e luftën kundër veprimtarive
të rënda kriminale transkombëtare, me aktualitet tragjik, përmes mjeteve të përshtatshme
të bashkëpunimit ndërkombëtar”. Prelati i lartë i Vatikanit citon Letrën Apostolike
të Benediktit XVI, në formën e “Motu Proprio”, për parandalimin dhe kundërshtimin
e veprimtarive të paligjshme në fushën financiare dhe monetare. Imzot Mambertì
thekson se këto ratifikime e bëjnë edhe më rigoroz Ligjin ekzistues në Vatikan kundër
pastrimit të parave, që vijnë nga veprimtaritë e krimit të organizuar dhe kundër financimit
të terrorizmit, duke ofruar mjetet e bashkëpunimit me shtetet e tjera në nivel ndërkombëtar.
Në fund, imzot Mambertì nënvizon se bashkëpunime të tilla ndërkombëtare do të
ishte mirë të vendoseshin edhe për të luftuar persekutimin fetar e mosrespektimin
e lirisë fetare të çdo njeriu, kudo në botë.