Krishterët të bashkuar për të çuar shpresën aty ku ka urrejtje e padrejtësi: kështu
tha Papa në mbyllje të Javës së lutjes për bashkim të të krishterëve.
Angazhimi për rivendosjen e bashkimit të të krishterëve është “detyrë dhe përgjegjësi
e madhe për të gjithë”. Kështu u shpreh mes tjerash Benedikti XVI, dje pasdite, në
Bazilikën e Shën Palit jashtë Mureve të Romës, gjatë udhëheqjes së bashkëkremtimit
të Mbrëmësores së dytë të festës së Kthimit të Shën Palit Apostull, në mbyllje të
Javës së lutjes për Bashkimin e të krishterëve, që sivjet iu kushtua temën: “‘Të gjithë
do të shndërrohemi nga fitorja e Jezu Krishtit, Zoti tonë (krh 1 Kor 15,51-58)’. “Prania
e Krishtit të gjallë na fton ne të gjithë të krishterëve të veprojmë së bashku për
të mirën”. “Të bashkuar në Krishtin – vijoi Papa Ratcinger duke iu drejtuar përfaqësuesve
të Kishave tjera e bashkësive të krishtera të pranishëm – jemi të thirrur të ndajmë
së bashku misionin e tij, që është pikërisht ai për të sjell shpresën aty ku sundon
padrejtësia, urrejtja e dëshpërimi”. “Ndarjet tona e bëjnë më pak të ndritshme dëshminë
tonë për Krishtin”, vërejti Papa Jozef Ratcinger, për të cilin edhe pse në “kulturën
e sotme dominuese, ideja e fitores shpesh është e lidhur me një sukses të menjëhershëm,
në optikën e krishterë, fitorja është proces i gjatë e i vështirë shndërrimi, që kërkon
durim e këmbëngulje të madhe, për të arritur shndërrimin e dëshiruar e rritjen e së
mirës”. Bashkimi i të krishterëve, pra, realizohet “sipas kohëve të Zotit e jo sipas
kohëve tona”, e udha në zhvillim e sipër “kërkon prej nesh fe të thellë e qëndrueshmëri
plot durim”.