Бэнэдыкт XVI скіраваў пасланне на Сусветны дзень місій
25 студзеня Бэнэдыкт
XVI скіраваў пасланне на Сусветны дзень місій, які будзе адзначацца ў кастрычніку
2012 г. Святы Айцец падкрэсліў, што ў гэтым годзе асабліва важна паразважаць аб місійнай
дзейнасці Касцёла ў сувязі з 50-годдзем апублікавання Дэкрэта “Ad gentes” ІІ Ватыканскага
Сабора, адкрыццём Года веры і Сінодам Біскупаў на тэму новай евангелізацыі. Святы
Айцец звярнуў увагу на тое, што ў сучасным свеце застаецца вялікая колькасць людзей,
“адкупленых крывёю Хрыста”, але не ведаючых аб Ім. “Мы павінны наследаваць той апостальскі
запал, які мелі першыя хрысціянскія супольнасці, маленькія і безабаронныя, але здольныя
прапаведваннем і сведчаннем, распаўсюдзіць Евангелле ва ўсім свеце, аб якім яны ў
той час ведалі”, - напісаў Пантыфік. Бэнэдыкт XVI нагадаў, што евангелізацыя павінна
ахопліваць усе сферы дзейнасці Касцёла, а яго члены “павінны моцна адчуваць заданне
прапаведваць Евангелле, якое было дадзена Хрыстом”. “Жаданне абвяшчаць Хрыста натхняе
нас ведаць гісторыю, каб убачыць праблемы, імкненні і надзеі чалавецтва, якія Хрыстус
павінен вылечыць, ачысціць і напоўніць сваёй прысутнасцю. Яго пасланне застаецца заўсёды
актуальным, уключаным у гісторыю і здольным даць адказ на самыя глыбокія патрэбы кожнага
чалавека”, - сказаў Папа. Пантыфік адзначыў, што шырокія далягляды і складанасць сучаснага
свету патрабуюць абноўленага падыходу, для больш эфектыўнага абвяшчэння Божага Слова.
Адной
з перашкодаў для евангелізацыі Папа назваў крызіс веры, не толькі ў заходнім свеце,
але таксама ва ўсім чалавецтве, якое, аднак, мае “голад і прагненне Бога”. Бэнэдыкт
XVI падкрэсліў, што місіянерская дзейнасць “з’яўляецца выразам глыбокага адзінства,
абмену і любові паміж Касцёламі”, а абвяшчэнне Евангелля звязана з дапамогай бліжняму,
увагай да бедных, сацыяльнай і міратворчай дзейнасцю.