Mesazhi i Papës për Ditën Misionare Botërore: Kisha t’i bëjë njerëzit të rizbulojnë
gëzimin e besimit në Zotin
50 vjet pas Koncilit II të Vatikanit, Kisha Katolike duhet të rigjejë urgjentisht
entuziazmin e bashkësive të para të krishtera, të cilat, megjithëse të vogla e të
pambrojtura, qenë në gjendje ta përhapin Ungjillin në gjithë botën. Kështu shkruan
Papa Benedikti XVI në Mesazhin për Ditën Misionare Botërore 2012, që u bë i njohur
sot. Misioni “ad gentes”, nënvizon Ati i Shenjtë, duhet të jetë horizonti i vazhdueshëm
i çdo veprimtarie të Kishës e burim i bamirësisë dhe i dashurisë së saj.
Në
kohën kur vendet e varfëra të jugut të planetit dhe një pjesë e atyre të lindjes,
etiketoheshin, pa u menduar shumë, si “Bota e Tretë”, ipeshkvijtë e rinj të atyre
Kishave mbërrinin në Romë, duke sjellë me vete një dëshmi të apasionuar: u tregonin
të gjithëve se ç’do të thoshte të ishe ungjillëzues, duke qenë pakicë, ose bashkësi
pa asnjë mjet në dispozicion. Benedikti XVI niset nga ky kuadër i Koncilit II të Vatikanit
- ku mori pjesë si meshtar – për të thënë se pikërisht ajo përvojë e Kishave të reja,
në formim e sipër, sjellë në Qytetin e Amshuar nga prelatët e Afrikës e të Amerikës
Latine, të Azisë e të Oqeanisë, kontribuoi dukshëm për të ripohuar nevojën dhe urgjencën
e ungjillëzimit “ad gentes”. 50 vjet pas Koncilit, ky këndvështrim është gjithnjë
aktual, madje, ka nxitur një reflektim të pasur teologjik e baritor, duke u konsideruar
si përparësi nga të gjithë Papët. Megjithatë, sqaron Benedikti XVI, mandati misionar
i Krishtit, besuar më parë Apostujve e sot ipeshkvijve, duhet të përfshijë gjithë
veprimtarinë e Kishës, nga famullitë tek institucionet fetare, nga lëvizjet kishtare
tek të krishterët e veçantë. Prandaj, si planet baritore, ashtu edhe organizimi dioqezan,
duhet t’i përshtaten jetës së Kishës, rrënjosur në të përditshmen e një bote në ndryshim
të vazhdueshëm e në pjesën më të madhe, jo vetëm në perëndim, në krizë feje.
Këtë
vit, nënvizon Benedikti XVI në Mesazhin për Ditën Misionare Botërore, Kisha Katolike
do të reflektojë mbi aspektet e ndryshme të kësaj teme, me kremtimin e Vitit të Fesë
dhe të Sinodit të Ipeshkvijve për ungjillëzimin e ri. Qofshin, uron Papa, “raste për
t’i dhënë hov të ri bashkëpunimit misionar”. E duke reflektuar për marrëdhëniet ndërmjet
fesë e detyrës së komunikimit të saj, Ati i Shenjtë kërkon sërish “entuziazëm”, për
t’i bërë njerëzit të rizbulojnë gëzimin e besimit në Zot, sidomos në ato vende, që
e njohin Ungjillin prej shekujsh, por që po humbasin pikat e referimit në Hyjin. Shqetësimi
për ungjillëzimin e popujve, nuk duhet të mbetet kurrë në plan të dytë në veprimtaritë
kishtare dhe në jetën personale të çdo të krishteri.
E pasioni për Ungjillin
duhet të shoqërohet gjithnjë me bamirësinë e dashurinë e krishterë, nënvizon Papa.
Shpallja e Lajmit të Mirë kthehet në “ndihmë për të afërmin, drejtësi për të varfërit,
mundësi arsimimi edhe në fshatrat më të humbura, asistencë mjekësore në vende të largëta,
dalje nga mjerimi, integrim në shoqëri për të mënjanuarit, mbështetje për zhvillimin
e popujve, kapërcim i ndarjeve etnike, respekt për jetën në çdo fazë të saj”. Duke
falenderuar apostujt e sotëm – meshtarë, rregulltarë e laikë – e në veçanti, Veprat
Papnore Misionare për përkushtimin e tyre, Benedikti XVI e drejton vështrimin e Kishës
mbi një model, që s’perëndon kurrë, atë të dymijë vjetëve më parë. Kemi nevojë, thekson
Papa, “të rigjejmë të njëjtin hov apostolik të bashkësive të para të krishtera, të
cilat, të vogla e të pambrojtura, qenë të afta, përmes shpalljes e dëshmisë, ta përhapin
Ungjillin në gjithë botën, që njihej deri atëherë”.