Kardinali Koh për bashkimin e të krishterëve: ekumenizmi ka nevojë për lutjen, që
të mos e humbasë shpirtin e tij.
Të mërkurën e kaluar, me një kremtim solemn në Bazilikën e Shën Palit jashtë Mureve
të Romës, u mbyll Java e Lutjes për Bashkimin e të krishterëve. Benedikti XVI
kryesoi kremtimin e Lutjeve të dyta Mbrëmësore të festës liturgjike të Kthimit të
Shën Palit. Ishte një takim tradicional, me vlera të mëdha ekumenike, në të cilin
morën pjesë delegacione të shumta të Kishave ortodokse e protestante. Për Javën
e Lutjes dhe marrëdhëniet ekumenike, i kërkuam një reflektim kardinalit Kurt Koh,
kryetar i dikasterit vatikanas për bashkimin e të krishterëve: Përgjigje:
- Java e Lutjes për Bashkimin e të Krishterëve është pikërisht zanafilla
e lëvizjes ekumenike. Që nga fillimi, u miratua dhe u mbështet nga Papët, duke nisur
nga Leoni XIII e Benedikti XV. Këtë fillesë të lëvizjes ekumenike nuk mund e nuk duhet
ta harrojmë. Përkundrazi, duhet të na shoqërojë gjithnjë, sepse lutja për unitetin
është themeli i ekumenizmit. Koncili II i Vatikanit flet për shpirtin e lëvizjes ekumenike:
në se lëvizja ekumenike nuk dëshiron ta humbasë shpirtin e saj, duhet të takohet vazhdimisht
në lutje. Përmes lutjes dëshmojmë se nuk jemi ne, qenie të brishta njerëzore, që e
krijojmë bashkimin: madje nuk jemi as në gjendje të parashikojmë si do të jetë ky
bashkim e kur do të realizohet. Por ndërkaq dimë se duhet t’i shkrijmë të gjitha aftësitë
tona e t’ia hapim zemrat Shpirtit Shenjt, sepse është Shpirti i Zotit ai, që e dëshiron
këtë bashkim, e po ai, që do të na e dhurojë.
Pyetje: - Cilat janë
sfidat që duhet të përballojë ekumenizmi sot?
Përgjigje: -
Në vitet dhe në dhjetëvjeçarët e fundit, e kemi humbur paksa nga sytë qëllimin e lëvizjes
ekumenike. Kishat e bashkësitë kishtare nuk po ecin më drejt të njëjtit cak: besoj
se sot është e nevojshme të kthehemi, të reflektojmë e të pyesim përsëri, cilat janë
realisht objektivat tona. Për ne, katolikët, ashtu si edhe për ortodoksët, qëllimi
i fundmë është bashkimi i plotë në fe, në Sakramentet e në shërbimet e Kishës. Uniteti
është kërkesë, që buron nge vetë Zemra e Krishtit. Ai u lut që të gjithë të jenë Një,
për të besuar bota. Prandaj ekumenizmi nuk ka rrugë të tjera, veç asaj të bashkimit
të plotë.
Pyetje: - Këto ditë Papa nënvizoi disa herë vlerën e madhe
të kësaj Jave të Lutjes për Bashkimin e të Krishterëve….
Përgjigje: -
Ati i Shenjtë mbajti qëndrim shumë të qartë lidhur me këtë: më 18 janarin e kaluar,
në audiencën e pëgjithshme të së mërkurës, kushtuar plotësisht këtij argumenti, e
po ashtu edhe të dielën që pasoi, në lutjen e Engjëllit të Tënzot, ritheksoi me forcë
temën e sivjetme të Javës së Lutjes dhe nënvizoi se të gjithë do të shndërrohemi
përmes fitores së Jezu Krishtit, Zotit tonë. Kujtoi edhe se ne mund të arrijmë me
të vërtetë në cakun e bashkimit të plotë, vetëm në se e lëmë Zotin të veprojë. Uniteti
i dukshëm i gjithë të krishterëve, shtoi, është përherë vepër, që vjen nga lart, nga
Zoti. Është vepër, që kërkon përvujtëri, kërkon njohjen e ligështive tona e pranimin
e dhuratës së Zotit. Foli për ekumenizmin, duke e parë gati-gati si kthim të të gjithëve
në Krishtin.