Спікер славацкага парламента Павол Грушоўскі падчас свайго візіту ў Ватыкан скіраваў
чарговае запрашэнне папе Бэнэдыкту XVI наведаць яго краіну. Прэзідэнт Славкіі Іван
Гаспаровіч і біскупская канферэнцыя ўжо запрасілі год таму Святога Айца наведаць Братыславу
і Нітру падчас святкавання 1150-га юбілею прыбыцця ў рэгіён былой Вялікамараўскай
імперыі святых Кірыла і Мятода. Грушоўскі прабываў у Рыме на мінулым тыдні па запрашэнні
італьянскіх парламентарыяў.
У мінулагоднім запрашэнні адзначалася, што аптымальным
часам наведання Славакіі мог бы стаць ліпень 2012 г. Прэс-сакратар славацкай Канферэнцыі
Біскупаў кс. Ёзэф Ковачык паведаміў, што Святы Пасад не даў “ні станоўчага, ні адмоўнага
адказу”. “Гэта дазваляе нам спадзявацца”, - сказаў святар.
Апостальскі нунцый
у Славацкай Рэспубліцы арцыбіскуп Марыё Джордана сказаў некалькі дзён таму, што ўсё
яшчэ не прынята рашэнне па гэтым пытанні. Ён чакае з “сэрцам поўным надзеі”, што Папа
прыедзе ў Славакію.