24 студзеня ў Залі
Друку Апостальскай Сталіцы адбылася прэзентацыя Паслання Бэнэдыкта XVI на 46-ы Сусветны
дзень сродкаў масавай камунікацыі на тэму: “Маўчанне і Слова: шлях да евангелізацыі”.
Арцыбіскуп Клаўдыё Марыя Чэллі, старшыня Папскай рады па сродках масавай камунікацыі,
падкрэсліў падчас прэзентацыі, што Святы Айцец у сваім пасланні аналізуе культуру
чалавечых адносін: “У апошнія гады Папа быў вельмі ўважлівы да працэсаў і дынамікі
камунікацыі, асабліва ў кантэксце культурных зменаў, якія адбываюцца ў рэчышчы развіцця
тэхналогій”. Паводле іерарха, Святы Айцец звяртае ўвагу на класічны аспект чалавечых
адносін: маўчанне і спалучэнне маўчанне-слова.
Кіраўнік Паскай рады нагадаў
старажытную мудрасць аб тым, што маўклівае слуханне можа выказваць блізкасць, салідарнасць
і клопат аб іншым. Маўчанне, паводле арцыбіскупа Чэллі, з’яўляецца актыўным стаўленнем
– дае іншаму прастору для выказвання. Іерарх звярнуў увагу, што Святы Айцец ставіць
фундаментальнае пытанне, якім з’яўляецца пошук праўды. Гэта, у сваю чаргу, гаворыць
аб важнасці маўчання як прывілеяванага стану, у якім чалавечая істота знаходзіцца
сама перад сабой і перад Богам.
На думку старшыні Папскай рады, Святы Айцец
у некалькіх словах змог дапамагчы нам пазнаць таямнічае вымярэнне адносін паміж сузіраннем
і апостальствам. “Менавіта ў гэтай таямніцы нараджаецца місія Касцёла, якая заахвочвае
хрысціянаў быць прапаведнікамі надзеі і збаўлення, сведкамі любові, якая спрыяе чалавечай
годнасці і стварае справядлівасць і мір”, - падкрэсліў арцыбіскуп Чэллі падчас прэзентацыі
Паслання Бэнэдыкта XVI на 46-ы Сусветны дзень сродкаў масавай камунікацыі.