Nesër në Romë kremtimi ekumenik i Papës në Bazilikën e shën Palit

Nesër, më 25 janar, Papa Benedikti XVI do të shkojë në Bazilikën e Shën Palit jashtë Mureve të Romës për kremtimin tradicional të Lutjes së Mbërësores së Dytë të solemnitetit të festës së Kthimit të Shën Palit, Apostull, në përfundimin e Javës së Lutjes për Bashkimin e të Krishterëve që sivjet pat si temë: ‘Të gjithë do të shndërrohemi nga fitorja e Jezu Krishtit, Zoti tonë (krh 1 Kor 15,51-58)’.
Të dielën e kaluar gjatë lutjes së Engjëllit të Tënzot Papa theksoi se Jemi të ftuar të kundrojmë fitoren e Krishtit mbi mëkat e mbi vdekje, çka do të thotë ngjalljen e tij, si një ngjarje që transformon rrënjësisht ata që besojnë në Të e atyre u hap udhën e një jete që nuk prishet e cila është e pavdekshme”.
E në dritën e Letrës së parë të Shën Palit drejtuar Korintianëve, Kisha na fton të gjithë të reflektojnë mbi faktin se Kisha nuk është një organizëm uniform. Apostulli i Popujve e krahason atë me trupin e njeriut, që “është një i vetëm, por ka shumë gjymtyrë”. Prandaj, Kisha paraqitet si një organizëm i pasur e jetësor, fryt i një Shpirti të vetëm, që i udhëheq të gjithë besimtarët drejt bashkimit të thellë. Kisha përmban në vetevete karizma të ndryshme, duke krijuar gjithsesi një bashkësi të harmonishme, që zgjat në histori praninë e Zotit të Gjallë. Këtu qëndron shenjtëria e saj.
Sipas Papës Bemediktit XVI “është pikërisht në Krishtin e në Shpirtin e Hyjit, që Kisha është një dhe e shenjtë, pra një bashkim intim, që shkon përtej aftësive njerëzore dhe i mbështet ato”.
Këto reflektime kanë rëndësi të veçantë pikërisht në pragun e mbylljes së javës së lutjes për bashkimin e të krishterëve, me kremtimin tradicional të lutjes së Mbrëmësores që do të kryesohet nesër nga Papa Benedikti XVI, në Bazilikën e Shën Palit jashtë mureve të Romës. Në këtë takim e kremtim të rëndësishëm urate, do të marrin pjesë edhe përfaqësues të Kishave të tjera të krishtera.
E Kisha mbarë do t’i lutemi Zotit për dhuratën e bashkimit të plotë të të gjithë dishepujve të Krishtit. E me të vërtetë, bashkimi i të krishterëve e bën më të besueshme dhe më të frytshme shpalljen e Ungjillit, siç pohoi vetë Jezusi duke iu lutur Atit Qiellor në pragun e vdekjes: “Që të gjithë të jenë një gjë e vetme… që bota të besojë”. Kisha pra, na fton të lutemi për bashkimin e të krishterëve dhe për të qenë bujarë me dhuratat që na bën Zoti, duke kujtuar se Hyji do që t’i shërbejmë, të bashkuar në fe.