՝՝Հրանդ ՏԻՆՔ-ի Հարցը Պէտք Է Քննուի Դատական Անկախ Համակարգի Մը Կողմէ՝՝ (Կը Յայտարարէ
Միացեալ Նահանգներու Արտաքին Գործոց Նախարարութիւնը) :
Միացեալ Նահանգներու արտաքին գործոց նախարարութիւնը յայտարարած է, որ Հրանդ Տինքի հարցը
քննելու համար անհրաժեշտ է դատական անկախ համակարգ: Նախարարութեան ներկայացուցիչ Վիքթորիա
Նիւլընտ, Յունուար 19ին կայացած մամլոյ ասուլիսի մը ընթացքին ըսած է թէ ՝՝Ուաշինկթըն
Թուրքիոյ կառավարութեան հետ «կանոնաւոր կապ հաստատած է՝ այդ եւ այլ հարցերու կապակցութեամբ:
Թուրքիոյ կառավարութիւնը եւ Տինքի ընտանիքը կը սպասեն, որ գործը ի վերջոյ քննուի Թուրքիոյ
վերաքննիչ դատարանին կողմէ»: Ան շեշտած է, թէ դատական անկախ համակարգի առկայութիւնը
վճռական դեր կը խաղայ առողջ ժողովրդավարութեան համար: Պատասխանելով այն հարցումին,
թէ արդեօք Ուաշինկթըն կը կարծէ՞, որ Թուրքիոյ մէջ կը գործէ նման դատական համակարգ՝Վիքթորիա
Նիւլընտ նշած է. «Թուրքիա պարտաւոր է երաշխաւորել այն փաստը, որ իր դատական գործընթացները
կը համապատասխանեն այդ չափանիշներուն»՝ ըսած է,առանց յաւելեալ յստակացում կատարելու: Իր
կարգին, ԵւրոՅանձնաժողովի մարդկային իրաւունքներու յանձնակատար Թոմաս Համերպըրկ յայտարարած
է, թէ Տինքի դատական գործով հրապարակուած վճիռը ցոյց կու տայ Թուրքիոյ դատական համակարգին
անկատար վիճակը: «Ակնյայտ է, որ դատարանը սխալ որոշում տուած է՝ նկատի ունենալով առկայ
ապացոյցներն ու վկաներու ցուցմունքները, որոնք ցոյց կու տան, թէ յանցագործութեան ետին
կանգնած է կազմակերպուած խմբաւորում մը: Եթէ ամբողջ իրականութիւնը բացայայտելու համար
դատարանին յաւելեալ ժամանակ հարկաւոր էր, ապա անիկա ինչո՞ւ աւարտեց դատը: Թուրքիոյ դատական
համակարգը անկատար է եւ երկիրը պէտք է արագ քայլերու դիմէ՝ զայն բարեփոխելու ուղղութեամբ,
այլապէս ժողովուրդը արդարադատութեան նկատմամբ իր հաւատքը պիտի կորսնցնէ: Կատարուած սխալը
խիստ վտանգաւոր է: Հրանդ Տինքի դատավարութիւնը կարեւոր քննութիւն է պետական ծառայողներու
կատարած յանցագործութիւնները պատժել-չպատժելու հարցով: Արդարեւ Յունուար 17ի վճիռն այդ
քննութեան անյաջողութիւնն է», եզրակացուցած է Թոմաս Համերպըրկ:
Նաեւ, ԵւրոԽորհրդարանին
մօտ Թուրքիոյ հարցով զեկուցող Ռիա Օմեն Ռուիճտեն իր «յուսախաբութիւնը» յայտնած է դատավճիռին
առթիւ: «Հրանդ Տինքի հարցը օրինակ կրնար ծառայել այն բանին համար, թէ պատշաճ կերպով գործող
դատական հաստատութիւնները ինչպէ՛ս կ՛աշխատին: Այս դատավճիռը կը յստակացնէ, որ Թուրքիոյ
մէջ դատական բարեփոխումները անհրաժեշտ են», աւելցուցած է ան:
Վերջապէս, Թուրքիոյ
խորհրդարանի նախագահ Ճեմիլ Չիչեք ընդունած է, թէ Տինքի սպանութիւնը եւ 5 տարիէ ի վեր
շարունակուող դատական գործընթացը բացասական ազդեցութիւն ունեցած են Թուրքիոյ հեղինակութեան
վրայ: