Վատիկանի Եւ ֆրանսայի Թղթատարութիւնը Մտադիր Են Դրոշմաթուղթ Հրապարակել Ի Պատիւ Սրբուհի Ժան Տ'Արգին, Անոր Ծննդեան 600-ամեակին Առթիւ։

Սրբուհի Ժան'Արգի, որ ճանչցուած է որպէս Օրլէանի կոյսը, ծննդեան 600 ամեակին առթիւ՝ Վատիկանի եւ ֆրանսայի թղթատարութիւնները որոշած են միասնաբար դրոշմաթուղթ մը հրապարակել մեծարելու յիշատակը նահատակ հերոսուհիին։ ֆրանսական թղթատարութիւնը մայիս ամսոյն կէսին 0,89 եւրոյով դրոշմաթուղթ մը պիտի հրապարակէ ուր Սրբուհին կը պատկերացուի զինազգեստով` ու դրօշը ձեռքին։ Վատիկանի դրոշմաթուղթը սեպտեմբերին հրապարակ պիտի ելլէ։
Օրլէանի կոյսը ծնած է 6 յունուար 1412-ին Տոմրեմի շրջանը բարեկեցիկ ու Աստուածավախ գիւղացի ընտանիքի դուստրը։
13 տարիկանին կ'անսայ ձայնը Միքայէլ հրեշտակապետին, սրբուհի Կատարինէի եւ սրբուհի Մարգարիտի, անոր հրամայելու ազատագրել ֆրանսան անկլիգան բռնագարւումէն եւ թագաւոր օծել տալ թագաժառանգ Շառլս 7-րդը՝ Ռէնսի աթոռանիստ եկեղեցւոյ մէջ։ Այդ թուականէն սկսեալ կ'աշխատի իրագործել լսած հրամանը 17 յուլիս 1429-ին, Ռենսի աթոռանիստ տաճարին մէջ օծել կու տայ Շառլս թագաւորը ապա կ'ազատագրէ Օրլէան եւ հետզհետէ ֆրանսան։
30 մայիս 1431-ին՝ Ժան Տ՝Արգ որպէս վհուկ ամբաստանուելով՝ ողջ ողջ հրկիզուեցաւ Ռուան քաղաքի մէջ։
1456ին Կալիստրատոս Գ. Քահանայապետը չեղեալ կը նկատէ անոր դատավարութիւնը։ Պիոս 10-րդ 1909-ին՝ զինք երանուհի կը հռչակէ, իսկ 1920ին՝ Պենետիկտոս ԺԵ Քահանայապետը սրբուհի կը հռչակէ. եւ 13 մայիս 1944-ին՝ Պիոս ԺԲ Քահանայապետի կողմէ կը հռչակուի ֆրանսայի երկրորդ պաշտպան սրբուհին։