Кс. Ламбардзі падверг крытыцы пастаноўку міланскага тэатра
Вялікі непакой католікаў Італіі выклікала тэатральная пастаноўка міланскага тэатра
“Парэнці” пад назвай “Аб канцэпцыі вобразу Божага Сына”. Дзяржсакратарыят Апостальскай
Сталіцы і Міланская архідыяцэзія выступілі з адмысловымі заявамі на гэты конт. Кс.
Фэдэрыко Ламбардзі таксама даў свае каментарыі ў сувязі з інцыдэнтам. Кіраўнік Залі
Друку адзначыў, што “сэнс ліста Дзяржсакратарыяту вельмі ясны. Беручы пад увагу факт,
што гэты твор з’яўляецца абразлівым для хрысціянскіх рэлігійных супольнасцяў, у лісце
гучыць заклік, каб любая непавага такога роду сустракала трывалую і сумесную рэакцыю
хрысціянскай супольнасці”.
Каментуючы змест звароту Міланскай архідыяцэзіі
кс. Ламбардзі адзначае, што “у лісце выказана неабходнасць прызнаваць і паважаць пачуцці
многіх міланскіх грамадзян, якія у асобе Есуса Хрыста бачаць Уцелаўленне Бога, поўню
чалавецтва і сэнс уласнага існавання”. Італьянскі езуіт выказаў упэўненасць, што падчас
падрыхтоўкі спектакля тэатр “Парэнці” мог бы з большай увагай паставіцца да грамадскага
вымярэння свабоды слова і прыйсці да высновы, што “малітва, як выраз нязгоды, не
можа быць спалучана з падобнымі эксцэсамі, нават, калі яны агучаны толькі словамі”,
- падкрэсліў кіраўнік Залі Друку.