Senegal: Imzot Mambertì në Senegal, për 50-vjetorin e marrëdhënieve diplomatike me
Selinë e Shenjtë.
Marrëdhëniet diplomatike ndërmjet Senegalit e Selisë së Shenjtë bazohen mbi dialogun
ndërmjet kulturave e feve. E ky dialog jep ndihmesën e vet të çmuar për zgjidhjen
e konflikteve, që kërcënojnë stabilitetin në botë. Këtë pohoi imzot Dominik Mambertì,
sekretar i Vatikanit për Marrëdhënie me Shtetet i cili, që të shtunën e kaluar ndodhet
në Senegal, për të marrë pjesë në kremtimet e 50-vjetorit të marrëdhënieve diplomatike
të vendit afrikan me Selinë Apostolike. Sekretari vatikanas shprehu kënaqësinë për
vlerat e solidaritetit dhe bashkëjetesën paqësore ndërmjet bashkësive të ndryshme
fetare të Senegalit, vlera që krijuan mundësitë për bashkëpunimin e frytshëm 50 vjeçar.
I pritur nga autoritetet më të larta shtetërore në vend, prelati i lartë foli
për bashkëpunimin e ngushtë ndërmjet Selisë së Shenjtë dhe Vendit afrikan në luftë
kundër fanatizmit dhe ekstremizmit, duke i parë fetë jo si burim dhune, por si faktor
paqeje, pajtimi e drejtësie. E kjo ndikon edhe mbi ekonominë e vendit, të cilin e
ndihmon të dalë nga prapambetja e të ecë në rrugën e zhvillimit të plotë. Sekretari
vatikanas për Marrëdhënie me Shtetet deklaroi edhe se Selia e Shenjtë e shikon këtë
vizitë në Senegal, si rast të përshtatshëm për promovimin e vlerave të Kontinentit
afrikan si dhe për mbështetjen e gjithë atyre, që punojnë për paqen. Prej këndej,
imzot Mambertì shpjegoi se Selia Apostolike i shikon me shpresë përpjekjet pozitive,
që po bën Afrika, posaçërisht në fushën e zhvillimit. Ndërsa i ndjek me trishtim,
shtoi prelati, problemet që minojnë stabilitetin, sidomos luftërat për shkaqe fetare,
ndërsa feja duhet të jetë gjithnjë faktor paqeje e pajtimi, siç është në Senegal. Gjatë
takimit me prelatin vatikanas, Ministri i Jashtëm senegalez njoftoi se vendi afrikan
është i gatshëm ta presë Benediktin XVI, me besim të plotë se një vizitë e tillë do
të ketë ndikim shumë pozitiv për vendin. Të dielën e kaluar imzot Mambertì bashkëkremtoi,
me kardinalin Theodor Adrien Sarr, kryeipeshkëv i Dakarit; me nuncin apostolik në
vend, imzot Lui Montemaior dhe me shumë përfaqësues të klerit senegalez, Meshën shenjte
në Katedralen e Kujtimit të Dakarit. Të pranishëm, autoritetet më të larta politike. Imzot
Mambertì shpjegoi se marrëdhëniet ndërmjet Selisë së Shenjtë e Senegalit, vendosur
që më 1961, bazohen jo vetëm mbi një miqësi të fortë, por edhe mbi interesin e përbashkët
për zgjidhjen e problemeve, që trondisin botën, si dhe mbi dialogun, për të parandaluar
konfliktet, që kërcënojnë Afrikën e botën. Kujtoi edhe rëndësinë e impenjimit të Senegalit
për mbështetjen e parimeve të laicitetit, gjë që ndihmon fuqimisht në respektimin
e vlerave të bashkësive të ndryshme fetare, në shërbim të mirëqenies së përgjithshme.
Duke iu drejtuar prelatit vatikanas, kardinali Sarr, në emër të popullit senegalez,
vlerësoi lart impenjmin e Selisë së Shenjtë për paqen në botë, në Afrikë e në Senegal.