Papa ipeshkvijve të SHBA-ve: kërcënime të rënda nga shekullarizmi radikal. Duhen katolikë
të impenjuar
Sfidat shpirtërore e kulturore të ungjillëzimit të ri, në reflektimin e Papës, që
sot priti grupin e dytë të ipeshkvijve të Konferencës Ipeshkvnore Amerikane, për vizitë
“ad Limina” në Vatikan. Kisha në SHBA-të, theksoi Benedikti XVI, duhet të ketë
rol themelor në kundërshtimin e rrymave individualiste, të cilat mbrojnë idenë e një
lirie të shkëputur nga e vërteta morale. Këndvështrimi mbi botën në këtë vend, nënvizoi
më tej Ati i Shenjtë, është formuar jo vetëm nga feja, por edhe nga impenjimi për
parimet etike, që rrjedhin nga natyra e nga Zoti. Por rrymat aktuale kulturore, jo
vetëm predikojnë krejtësisht në kundërshtim me moralin e traditës judeo-kristiane,
por janë gjithnjë e më tepër kundër krishterimit, si i tillë. Kisha predikon Ungjillin,
i cili, jo vetëm propozon të vërteta morale të pandryshueshme, por i konsideron si
çelës për lumturinë e begatinë e njeriut: “Në masën me të cilën, disa prirje
aktuale kulturore përmbajnë elemente, që mund ta reduktojnë shpalljen e këtyre të
vërtetave, duke i mbyllur në kufijtë e arsyetimit thjesht shkencor, ose duke i eliminuar
në emër të pushtetit politik, apo të parimit të shumicës, ato përfaqësojnë kërcënim
jo vetëm për fenë e krishterë, por edhe për vetë njerëzimin, për të vërtetat më të
thella të qenies sonë e të thirrjes sonë të fundme, marrëdhënieve me Zotin”. Kur
kultura përpiqet ta zhdukë përmasën e misterit të fundëm, duke u mbyllur portat të
vërtetave transhendentale, i hap dyert totalitarizmit, sqaroi Benedikti XVI, duke
cituar të Lumin Gjon Pali II. Por tradita e krishterë nuk flet për fe të verbër, vazhdoi
Papa. Ajo bazohet në impenjimin për ndërtimin e një shoqërie vërtet të drejtë e humane: “Mbrojtja
që i bën Kisha arsyes morale, të themeluar mbi ligjin natyror, bazohet në bindjen
se ky ligj nuk është kërcënim për lirinë tonë, por ‘gjuhë’, që na lejon ta kuptojmë
vetveten dhe të vërtetat e qenies sonë, për të krijuar një botë më të drejtë e më
njerëzore”. Mësimet e Kishës, theksoi Ati i Shenjtë, nuk janë kufizim për njeriun,
por çlirim. Për këtë arsye, dëshmia e saj është publike. Ekziston ndarja ndërmjet
shtetit e Kishës, por kjo nuk do të thotë që Kisha të heshtë për çështje të caktuara
e se shteti nuk duhet të impenjohet para besimtarëve, për mbrojtjen e vlerave, në
të cilat ata besojnë. Benedikti XVI i këshilloi ipeshkvijtë ta luftojnë në të gjitha
fushat këtë shekullarizëm radikal në gjirin e shoqërisë amerikane: “Shumë prej
jush nënvizuan se janë bërë përpjekje të organizuara për ta mohuar të drejtën e kundërshtimit
për hir të ndërgjegjes… përsa u përket praktikave të papranueshme për moralin e krishterë…
Më thanë për prirjen shqetësuese të reduktimit të lirisë së fesë, thjesht në lirinë
e kultit, pa garanci për respektimin e lirisë së ndërgjegjes”. Prej këndej,
lind nevoja e impenjimit të guximshëm të laikëve katolikë në debatin publik për të
ardhmen e shoqërisë amerikane. Kisha duhet t’i përgatisë e t’i formojë ata. Këtu Papa
përmendi punën e ipeshkvijve të SHBA-ve për të mbajtur lidhjet me katolikët e impenjuar
në politikë, për t’u kujtuar atyre përgjegjësinë në dhënien e dëshmisë së fesë, sidomos
për çështjet morale të kohës sonë. Duhen mobilizuar, përfundoi Papa, të gjitha burimet
intelektuale e morale të bashkësisë katolike për ungjillëzimin e ri të kulturës amerikane
e për ndërtimin e qytetërimit të dashurisë.