Кардынал Кох: Тыдзень малітвы за адзінства хрысціян павінен паказаць змест экуменізму
Карыднал Курт Кох,
старшыня Папскай рады спрыяння хрысціянскаму адзінству ў інтэрв’ю агенцтву “SIR” з
нагоды Тыдня малітвы за адзінства хрысціян, які пачынаецца ва ўсім Касцёле 18 студзеня,
адзначыў прагрэс у экуменічным і міжрэлігійным дыялогу ў перыяд пасля ІІ Ватыканскага
Сабору. Ён нагадаў, што Рада спрыяння хрысціянскаму адзінству, якая была створана
папам Янам ХХІІІ у 1960 г., яшчэ напярэдадні Сабору, сёння вядзе дыялог з 16 рознымі
супольнасцямі ўнутры хрысціянства.
Гаворачы аб стане дыялогу з праваслаўнымі
і пратэстантамі, кіраўнік дыкастэрыі адзначыў, што калі ў выпадку дыялогу з праваслаўнымі
ўдалося зрабіць шмат крокаў да набліжэння, то з пратэстанцкімі супольнасцямі дыялог
ўскладніўся. З’явіліся тры новыя выклікі: вялікая колькасць рэфармацкіх Цэркваў і
з’яўленне ўсё новых, разнастайнасць падыходу да пытанняў этыкі і рознае разуменне
мэты экуменізму. Многія рэфармацкія супольнасці бачаць адзінства як суму ўсіх Цэркваў.
“Такі экуменічны погляд мы як католікі не можам прыняць”, - падкрэсліў кард. Кох.
Кардынал
адзначыў новую з’яву ў экуменізме – пераход англіканаў у каталіцтва. Трэба нагадаць,
- падкрэсліў іерарх, - што Святы Айцец ясна вызначыў спецыфіку дадзенай з’явы ў спецыяльнай
Апостальскай канстытуцыі “Anglicanorum coetibus.”
“ІІ Ватыканскі Сабор гаварыў
аб духоўнасці як душы экуменічнага руху і, у гэтым сэнсе, Тыдзень малітвы за адзінства
хрысціян павінен паказаць самы змест экуменізму”, - падкрэсліў кіраўнік Папскай рады
спрыяння хрысціянскаму адзінству.