Իրանը Արաբական ծոցի երկիրները զգուշացուց իրանեան քարիւղի ներածման դէմ արգելքի հաստատման
պարագային միջազգային շուկային մէջ իրանեան քարիւղի բացակայութիւնը փոխհատուցելու քայլէն: Իրանեան
«Շարք» օրաթերթը կը հաղորդէ, որ ՕՓԵՔ-ի մէջ Իրանի ներկայացուցիչը՝ Մոհամետ Ալի Խաթիպի
յայտնած է, որ «Պարսից ծոցին մէջ քարիւղ արտածող երկիրները, եթէ իրանեան քարիւղի բացակայութեան
բացը գոցելու կանաչ լոյսը տան, պատահելիքին համար իրենք պատասխանատու պիտի ըլլան»: Իրանեան
արտաքին գործոց նախարարութեան բանբերը՝ Ռամին Մեհմանփարասթ յայտարարեց, որ Միացեալ Նահանգներ
Հորմուզի նեղուցի հարցին շուրջ Իրանին պատգամ մը փոխանցած են: Միւս կողմէ, Բրիտանիոյ
արտաքին գործոց նախարար՝ Ուիլիըմ Հէյկ յայտարարեց, որ Միջին Արեւելքը անկայունութեան
հանգրուան կրնայ մուտք գործել, եթէ իրանեան հիւլէական ծրագիրին շուրջ տագնապը բարդանայ
եւ Իրան իր հիւլէական փառամոլութենէն չհրաժարի: