Papa në Engjëllin e Tënzot: emigrantët nuk janë numra, por njerëz, që kërkojnë një
vend ku të jetojnë në paqe.
“Emigrantët nuk janë numra, por njerëz, në kërkim të një vendi, ku mund të jetojnë
në paqe”. Në të Dielën II të Kohës së Zakonshme gjatë vitit kishtar, e në përkim me
Ditën Botërore të Emigrantit e të Refugjatit, dje, në Engjëllin e Tënzot, Benedikti
XVI u lut për burrat, gratë, fëmijët, të rinjtë e pleqtë, protagonistë të kumtimit
të Ungjillit të Krishtit në shoqërinë bashkëkohore. Papa kujtoi edhe se kjo javë,
që sapo filloi, i kushtohet lutjes për bashkimin e të krishterëve e, në përfundim,
i përshëndeti besimtarët e pranishëm në Sheshin e Shën Pjetrit në gjuhët kryesore
të botës.
Në lutjen e
djeshme të Engjëllit të Tënzot, Benedikti XVI i ftoi të gjithë besimtarët të jenë
dëshmitarë të vërtetë të Ungjillit, përhapës të Lajmit të Mirë, përkrah me refugjatët
e emigrantët, e ta jetojnë konkretisht solidaritetin e krishterë, jo vetëm me fjalë,
por kryesisht, me vepra. Duke kujtuar se dje kremtohej Dita e 98-të Botërore e Emigrantit
dhe e Refugjatit, Papa theksoi: “Miliona njerëz përfshihen sot në
fenomenin e emigracionit, por ata nuk janë thjesht numra. Janë burra e gra, fëmijë,
të rinj e pleq, që kërkojnë një vend, ku të jetojnë në paqe. Në mesazhin tim për këtë
Ditë, tërhoqa vëmendjen mbi temën “Emigrimi dhe ungjillëzimi i ri”, duke nënvizuar
se emigrantët janë jo vetëm marrës, por edhe protagonistë të kumtimit të Ungjillit
në botën bashkëkohore”. Papa i nxiti besimtarët t’i kuptojnë më mirë nevojat
e emigrantëve e të refugjatëve, e posaçërisht, dëshirën e tyre për të takuar Zotin.
I ftoi edhe të luten për të gjithë njerëzit, që jetojnë në dhe të huaj. Më pas përshëndeti
përfaqësuesit e bashkësisë së mërgimtarëve të Romës, të pranishëm në Sheshin e Shën
Pjetrit dhe bekoi në mënyrë të posaçme polakët, që jetojnë jashtë atdheut. Papa kujtoi
se nga 18 deri më 25 janar do të kremtohet Java e Lutjes për Bashkimin e të Krishterëve.
Prej këndej, i porositi të krishterët të luten për arritjen e shpejtë e të plotë të
këtij bashkimi: “I ftoj të gjithë, besimtarë e bashkësi, të mblidhen shpirtërisht
e, ku është e mundur, edhe praktikisht, për t’i lypur Zotit dhuratën e bashkimit të
plotë ndërmjet dishepujve të Krishtit”. Më pas Papa reflektoi mbi temën
e thirrjes, që theksohej në Leximet e djeshme biblike. Në Ungjill, shpjegoi Benedikti
XVI, ndjekim Jezusin në çastet kur u bën thirrje dishepujve të parë për të ecur në
gjurmët e tij; ndërsa në Leximin e parë, dëgjojmë thirrjen e Samuelit profet. Në
të dy leximet, vihet theksi mbi figurën e ndërmjetësuesit, që i ndihmon njerëzit e
thirrur ta njohin zërin e Zotit e ta ndjekin. Në rastin e Samuelit, shpjegoi Papa,
këtë rol e luan Eli, prifti i tempullit të Silo-s. Ndërsa në rastin e dishepujve të
Jezusit, figura ndërmjetësuese është Gjon Pagëzuesi. Nënvizoi, kështu, rolin vendimtar
të udhëheqësit shpirtëror në rrugën e fesë e, posaçërisht, në përgjigjen ndaj thirrjes
për ta vënë gjithë jetën në shërbim të Zotit e të popullit të Tij: “Vetë
feja e krishterë, të kujton menjëherë kumtimin e dëshminë: ajo kërkon ta pranosh lajmin
e mirë se Jezusi i Nazaretit vdiq e u ngjall, se Krishti është Zot. E kështu, edhe
thirrja për ta ndjekur Jezusin më nga afër, duke hequr dorë nga formimi i familjes
së vogël, për të hyrë në familjen e madhe të Kishës, normalisht kalon përmes dëshmisë
dhe propozimit të një vëllai më të madh, zakonisht, meshtar. Pa harruar edhe rolin
themelor të prindërve, të cilët me fenë e tyre të vërtetë e të gëzueshme, si dhe me
dashurinë e tyre bashkëshortore, u tregojnë fëmijëve se është gjë e bukur dhe e mundshme
ta ngresh gjithë jetën mbi dashurinë e Zotit”. Papa e luti Virgjërën Mari
për të gjithë edukatorët, posaçërisht për meshtarët e prindërit, që të jenë plotësisht
të vetëdijshëm lidhur me rëndësinë e rolit të tyre shpirtëror e t’i ndihmojnë të rinjtë
jo vetëm të rriten si njerëz, por edhe t’i përgjigjen Zotit, kur i thërret. Më pas
shpjegoi se krishterimi ynë nuk bazohet mbi një teori të thatë, së cilës i ka kaluar
koha. Të jesh i krishterë, vijoi, do të thotë të takosh Krishtin, që është i gjallë,
që na thërret. Sa më shumë t’i afrohemi Jezu Krishtit, aq më tepër do të jemi plot
me dashurinë e me jetën e Tij. T’ia përcjellim, pra, edhe të afërmit tonë këtë entuziazëm,
që buron nga prania e Zotit në zemrat tona. Është Ai, që e bën jetën tonë të ndritshme
e të lume.