Denoncim nga Pakistani: spastrim etniko-fetar kundër fëmijëve të krishterë
Përdhunime e tortura kundër fëmijëve, kërcënime kundër familjeve, abuzime e dhunë
kundër viktimave, që, të tmerruara, nuk guxojnë të flasin: kjo është gjendja në lagjet
periferike të Karaçit, qytetit më të madh të Pakistanit jugor, qendër e provincës
së Sindh-it. Denoncimin shokues e bën një parlamentar katolik i provincës, Majkëll
Xhejvd, në një bisedë me agjensinë e lajmeve Fides. Të krishterët, jep alarmin Xhejvd,
pësojnë prej muajsh dhunën e jashtëzakonshme të lëvizjeve politike me bazë të theksuar
etnike dhe myslimane, si ajo e pashtunëve. Familjet e krishtera po përjetojnë një
kalvar, të cilin s’kanë guxim as ta denoncojnë nga frika, flet për ta parlamentari.
Vetëm gjatë muajit të kaluar janë regjistruar 15 raste përdhunimesh. Në njërën nga
lagjet, ekzistojnë qeli të vërteta torture, ku përdhunohen e mbahen të mbyllur fëmijë
të krishterë, vajza e djem. Për t’i liruar, u kërkohet familjeve deri në 10 mijë rupi,
shifër e paarritshme për to. Kështu, të vegjlit torturohen derisa nuk njihen më. Në
një rast tjetër, pikërisht pranë një kishe, është hapur një shtëpi, ku vajza kristiane
detyrohen të kthehen në prostituta. Si rezultat, shumë familje të krishtera janë larguar
nga Karaçi, duke realizuar pa dashur, qëllimin e fondamentalistëve: spastrimin etnik
e fetar të zonës, në favor të islamikëve. Megjithëse janë lajmëruar, deri tani, autoritetet
nuk kanë reaguar. Siç njoftohet nga agjensia Fides, këto lagje janë shumë të varfëra,
me probleme të jashtëzakonshme kriminaliteti e droge. Mungojnë shkollat e shërbimet
shoqërore, prandaj mbretëron dhuna. Kisha është e pranishme me shkolla, me një qendër
për të ndihmuar të droguarit, me motrat e Nënë Terezës e me françeskanet e Zemrës
së Krishtit. Por, nuk mjafton!