Polemika në BE për Kushtetutën hungareze: intervistë e ipeshkvit-ndihmës, të Budapestit.
Dje, në Parlamentin evropian të Strasburgut u paraqitën drejtimet kryesore të semestrit
të presidencës daneze, por sidomos, u zhvillua një debat i ashpër mbi Kushtetutën
e re hungareze, në fuqi, që nga fillimi i vitit. Komentet kritike kanë të bëjnë me
lirinë e shtypit e të fesë e me kontrollin e qeverisë së Budapestit mbi Bankën Qendrore
e magjistraturën. Në mikrofonin tonë, ipeshkvi ndihmës i kryedioqezës së Eshtergom-Budapestit,
imzot Janosh Shékeli, shpjegon risitë kryesore, që sjell kjo Kushtetutë:
Përgjigje: - Kushteuta e re e Hungarisë, miratuar në vitin
2011, që nis me emrin e Zotit në hyrje, pohon se jeta njerëzore duhet mbrojtur që
nga zënia, në perëndimin e saj të natyrshëm dhe deklaron se Hungaria mbron institucionin
familjar, si besëlidhje jete ndërmjet burrit e gruas. Kushtetuta saktëson edhe se
familja është baza e vazhdimësisë së jetës së popullit e, në përcaktimin e taksave,
theksohet se duhen marrë mirë parasysh shpenzimet për edukimin e fëmijëve. Është e
qartë se shumë prej intelektualëve evropianë nuk u pëlqen ky pohim i vlerave themelore.
Madje i nxit të nisin sulmin. Veç kësaj, qeveria hungareze u ka vënë taksa të përkohshme
shtesë edhe bankave, për shkak të krizës ekonomike. E ky vendim e shqetëson jo pak
botën e financës.
Pyetje: - Ç’mund të na thoni lidhur me ligjin
për mjetet e komunikimit, kritikuar ashpër nga shtypi botëror?
Përgjigje:
- Në tekstin fillestar të ligjit kishte disa masa të tepruara. Ligji kërkonte,
për shembull, të kontrollohen gazetat, sipas shembullit të kontrollit, që ushtrojnë
shtetet evropiane mbi shtypin elektronik. Masa të tilla të tepruara u korrigjuan dhe
u shlyen nga teksti, duke ndjekur këshillat e Gjykatës Kushtetuese hungareze e të
disa organeve evropiane.
Pyetje: - Lexojmë gjithandej se në Hungari
janë kufizuar konfesionet e njohura e se liria e fesë është në rrezik. Si e përkufizon
Kushtetuta e re Kishën?
Përgjigje: - Synimi i këtij ligji
është ta përcaktojë mirë statusin juridik të Kishës, në drejtësinë civile hungareze,
për të shmangur lulëzimin e “Kishave me synim fitimi” (business churches”). Duhet
ditur se në Hungari, ndryshe nga Italia, shkollat dhe institutet shoqërore e shëndetësore
të Kishave marrin nga shteti të njëjtin financim, që kanë shkollat e spitalet shtetërore.
Prej këndej, shkollat e Kishës janë falas për familjet, ashtu si dhe shkollat shtetërore.
Prandaj kanë lindur shumë kisha të rreme, qëllimi i vetëm i të cilave është të përfitojnë
nga ndihma shtetërore. Ligji i sotëm formulon më hollësisht kushtet që duhet të plotësojë
një bashkësi, për t’u njohur nga shteti si Kishë (për shembull, bashkësia duhet të
ketë jo më pak se njëmijë anëtarë, e të paktën prej njëzet vjetësh). Ndërkaq, bashkësitë
fetare, që nuk e kanë fituar statusin juridik si Kishë, mund të vijojnë qetësisht
jetën e tyre, si më parë, por nuk mund të marrin ndihma nga shteti. Vetë ligji u njeh
statusin juridik të Kishës, disa bashkësive fetare; ndërsa të tjerat mund ta kërkojnë
këtë status në të ardhmen.
Pyetje: - Po përsa i takon krizës financiare,
ç’masa ka marrë qeveria?
Përgjigje: - Natyrisht, qeveria e
sotme hungareze ka edhe gabime. Në ligjin mbi Bankën qëndrore bëri disa ndryshime,
që të krijonin idenë se shteti donte ta kufizonte pavarësinë kësaj Banke. Në të vërtetë,
qeveria deklaron e dëshiron ta respektojë pavarësinë e Bankës qëndrore, por ndryshimet
në ligjin e ri ishin të panevojshme e krijuan edhe rast për akuza. Përveç kësaj, qeveria
ndryshoi edhe kontratat e huave lidhur nga huamarrësit me bankat e ndryshme. Kjo
shkaktoi protestat e bankave. Qeveria duhet të ishte marrë vesh me bankat, e pas kësaj
marrëveshjeje, t’i ndihmonte personat huamarrës. Kjo marrëveshje tashmë është përfunduar.
Huamarrësit, bankat e shteti i ndanë së bashku pasojat e dobësimit të valutës hungareze.