Papa, Policisë në shërbim të Vatikanit: drejtësia shkelet, kur sundojnë kriteret e
fitimit e të suksesit.
Papa priti sot në audiencë, drejtuesit dhe punonjësit e Sigurimit Publik, që kryejnë
shërbimin në Vatikan. Në këtë takim tradicional të fillimit të vitit, Benedikti
XVI e drejtoi vështrimin kah viti i ri 2012, që filloi me shqetësime të reja. Prej
këndej, uroi që forcat e policisë të mbrojnë drejtësinë e t’i shërbejnë paqes. Më
pas, u ndalua tek episodet e dhunës e të intolerancës kundër të krishterëve, tepër
të shpeshta vitin e kaluar. Në përfundim të fjalimit, Papa u kërkoi ndjesë të pranishmëve
për tonin e ultë të leximit, sepse e kishte zërin të ngjirur.
Në fjalimin dejtuar
Inspektoriatit të Sigurimit Publik pranë Vatikanit, Papa uroi që forcat e policisë
të jenë gjithnjë mbrojtëse të drejtësisë e ndërtuese të sinqerta të paqes. Më pas
i falënderoi për shërbimin e tyre të përkushtuar në mbrojtje të rendit publik, në
një mjedis ku vijnë ditë për ditë shtegtarë të panumërt, që gjunjëzohen pranë Varreve
të Apostujve. Ati i Shenjtë e shfrytëzoi këtë rast edhe për të rikujtuar vuajtjet
e të krishterëve të shumtë, viktima të dhunës e të intolerancës, në të katër anët
e botës: “Vazhdimisht, në vise të ndryshme të botës, objekt i raprezaljeve dhe
i atentateve kanë qenë pikërisht të krishterët, që e paguan edhe me jetë besnikërinë
e tyre ndaj Krishtit e Kishës”. Kujtoi, më pas, edhe Mesazhin e tij për ditën
Botërore të Paqes, në të cilin vuri theksin mbi edukimin e të rinjve me frymën e drejtësisë
e të paqes. Dy terma, vërejti, që shpesh përdoren me dy kuptime: “Drejtësia
nuk është normë e thjeshtë njerëzore: kur, në emër të asaj që vetëquhet drejtësi,
sundojnë kriteret e dobisë e të pasjes, nuk është për t’u çuditur në se shkelen nën
thembër vlera e dinjiteti i njeriut”. Drejtësia, ripohoi Papa, është virtyt,
që e shtyn vullnetin njerëzor t’i japë tjetrit çka i përket, mbi bazën e punës që
bën e të djersës që derdh. E po kështu edhe paqja, nuk është vetëm mungesë e luftës
e as vetëm rezultat i veprimtarisë së njerëzve për ta shmangur atë, por, mbi të gjitha,
është dhuratë e Zotit, që duhet lypur me fe të gjallë, ndërsa, për ta gjetur, duhet
ecur në rrugën që na tregon vetë Jezu Krishti.: “Paqja e vërtetë sigurohet ditë
për ditë me kontributin e pasionuar, solidaritetin, vëllazërimin e bashkëpunimin e
secilit nga ne. Ajo lidhet ngushtësisht me drejtësinë dhe frymëzohet nga vërtetësia,
e thënë me dashuri. Njerëzit mund ta realizojnë duke u nisur nga rrethanat, në të
cilat jetojnë ditë për ditë: nga familja, puna, lidhjet e miqësisë”. Papa kujtoi
edhe numrin e madh të njerëzve nga mbarë bota, që viziton çdo ditë Vatikanin, zemër
e Kishës katolike, duke theksuar se një dyndje e tillë shtegtarësh nuk krijon kurrfarë
problemi për Romën e për mbarë Italinë, përkundrazi, është burim pasurie e krenarie.