Святы Айцец падзякаваў рымлянам за адкрытасць, шчырасць і салідарнасць
12 студзеня Бэнэдыкт
XVI прыняў на прыватнай аўдыенцыі кіраўніка рэгіёна Лацыё Рэнату Пальверыні, мэра
Рыма Джаванні Алемано і кіраўніка Рымскай правінцыі Ніколу Дзінгарэцці. Пасля прыватных
сустрэч з палітыкамі Пантыфік сустрэўся ў Клеменційскай Залі Апостальскага Палаца
ў Ватыкане з адміністрацыяй рэгіёна Лацыё, Рыма і Рымскай правінцыі. У сваёй прамове
да прысутных Папа нагадаў, што ў аснове эканамічнага крызісу, які таксама закрануў
дадзены рэгіён, ляжаць этычныя праблемы, індывідуалізм, прага ўласнай нажывы, занядбанне
праблем моладзі і людзей сталага ўзросту. “Цяперашні крызіс можа стаць нагодай для
ўсёй грамадскай супольнасці, каб паглядзець на тое, ці сапраўды каштоўнасці, якія
знаходзяцца ў аснове сацыяльнага жыцця, спрыяюць нараджэнню больш справядлівага, роўнага
і салідарнага грамадства. Або наадварот, неабходна глыбокае пераасэнсаванне каштоўнасцяў,
на аснове якіх можа адбыцца абнаўленне грамадства і якія будуць спрыяць развіццю не
толькі эканомікі, але таксама інтэгральнаму дабру чалавека”, - сказаў Папа.
Святы
Айцец падкрэсліў важную ролю хрысціянскай супольнасці, а таксама розных інстытутаў
у спрыянні росту свядомасці прыналежнасці людзей да супольнай рэчаіснасці, “у якой
кожны, на падабенства чалавечага цела, важны для усіх”.
Папа нагадаў аб адкрытасці,
шчырасці і салідарнасці, якую аказалі шматлікім пілігрымам жыхары Рыма падчас беатыфікацыі
Яна Паўла ІІ і заклікаў адносіцца падобным чынам і да шматлікіх эмігрантаў, якія прыбываюць
з краін, “дзе беднасць часта з’яўляецца прычынай смерці”. Пантыфік заклікаў да салідарнасці
з сем’ямі і моладдзю і фарміравання культуры павагі да закона.