Imzot Fontana kërkon solidaritet për popullsinë e Tokës Shenjte që të mos ndjehet
e braktisur
Në vigjilje të përfundimit të tij, shtegtimi i ipeshkvijve evropianë e amerikanë të
Koordinimit për Tokën Shenjte, arriti sot në etapën e parafundit, pasi ka përshkuar
disa etapa të tjera të rëndësishme. Është fjala për takimin vjetor të këtij ‘Koordinimi”.
Të pranishëm, anëtarë të konferencave ipeshkvnore botërore, të cilët u takuan me bashkësitë
e ndryshme fetare vendase, sidomos, me bashkësinë katolike. Një nga prelatët, kryeipeshkvi
italian i Areco-Kortonë-Santosepolcro, imzot Rikardo Fontana, na i pëshkruan
kështu, me telefon nga Gaza, ditët e para të shtegtimit, kur ipeshkvijtë u takuan
me bashkësinë katolike:
Përgjigje: - Takuam në në Meshë bashkësinë katolike,
që ishte e pranishme me shumicë. Pastaj katolikët na folën për vështirësitë më të
mëdha, që lidhen kryesisht me pamundësinë për të dalë nga vendi. Mungon, natyrisht,
edhe puna, ndjehen vështirësi të mëdha në komunikimim me jashtë e shumë familje jetojnë
në mjerim.
Pyetje: - Familjet që takuat në Gazë, sigurisht kanë nevojë
për solidaritet; por ç’tip solidariteti do t’u shërbente më shumë….
Përgjigje:
- Kanë nevojë për atë tip solidariteti, që i ndihmon të mos ndjehen vetëm e të
izoluar, në një mjedis me shumicë myslimane, e jo gjithnjë tolerante. Realiteti, që
paraqitet më pozitiv, është ai i shkollave tona katolike, pikëtakimi për popullsitë
me përkatësi të ndryshme. Është një punë, që bëhet me syrin e ngulur në të ardhmen.
Pyetje:
- Si vijoi shtegtimi juaj?
Përgjigje: - Ne pastaj u rikthyem në
Jeruzalem, ku punuam për pesë ditë. U organizua takimi i përfaqësuesve të Konferencave
ipeshkvnore evropiane e veriamerikane. Vijuam ta studiojmë situatën, në mënyrë që
të mund t’i njoftojmë episkopatet tona për ndihmat, që mund të japim, në përkim me
nevojat e vendit. Është diçka tepër e bukur, sepse jemi të ftuar nga të gjithë ipeshkvijtë
e Tokës së Shenjtë. Patriku latin i Jeruzalemit, imzot Tval, është jashtëzakonisht
aktiv në këtë veprimtari e po bën vërtet shumë, por shumë bëjnë edhe të tjerët. Me
Rojtarinë e Tokës së Shenjtë kemi lidhje shumë pozitive, siç është e natyrshme, sepse
janë vëllezërit tanë të vegjël françeskanë.