Եւրոպական Միութիւնը Ազատ եւ Արդար Ընտրութիւններ Կ՝ակնկալէ Հայաստանէն։
Եւրոպական Միութեան ընդարձակման հարցերով յանձնակատարի բանբեր Փիթըր Սթանոն «Ազատութիւն»
ձայնասփիւռի կայանին տրուած բացառիկ հարցազրոյցին ընթացքին յայտնեց, որ Եւրոպական Միութիւնը
պատրաստ է 2012 թուականի խորհրդարանական ընտրութիւններէն ետք միջազգային հաւաք մը կազմակերպելու,
հայաստանեան բարեփոխումներուն աջակցելու համար: Ան ընդգծեց, որ ընտրութիւնները պէտք
է կատարուին ազատ եւ արդար կերպով: Եւրոպացի դիւանագէտը յայտնեց, որ 2012 թուականի
խորհրդարանական ընտրութիւններէն ետք Եւրոպական Միութիւնը պատրաստ է կազմակերպելու միջազգային
հաւաք մը, Հայաստանի մէջ կայուն բարեփոխումներու համար միջազգային համայնքի աջակցութիւնը
համախմբելու նպատակով: Եւրոպական Միութիւնը միշտ ընդգծած է, որ անհրաժեշտ է այս ընտրութիւնները
կատարել միջազգային չափանիշերուն համապատասխան եւ իրագործել ստանձնած պարտաւորութիւնները:
Ըստ դիւանագէտին, Եւրոպական Միութեան համար ամէնէն կարեւոր առաջնահերթութիւնը բարեփոխումներն
են ՝՝ժողովրդավարութեան մարզին, արդարադատութեան համակարգին եւ տնտեսական դաշտին մէջ՝՝
: «2011-ին մենք Հայաստանի կողմէ յառաջընթաց նկատեցինք բոլոր այս մարզերուն մէջ
եւ շատ կարեւոր է, որ այդ միտումը պահպանուի նաեւ հետագայ տարիներուն ընթացքին», յայտնեց
եւրոպացի դիւանագէտը: Ան նշեց, որ երկկողմանի յանձնառութիւն կայ ա՛լ աւելի ամրապնդելու
Հայաստանը եւ Եւրոպական Միութիւնը միացնող կապերը: Ըստ անոր, Հայաստան անշուշտ շատ կարեւոր
գործընկեր է Եւրոպական ընտանիքին համար` Արեւելեան դրացնութեան շրջագիծին մէջ, եւ Եւրոպական
Միութիւնը ուրախ է որ Հայաստան աշխուժ եւ նորանոր նախաձեռնութիւններ կ՛իրականացնէ: