Nesër Papa Benedikti XVI do të kryesojë në ora 9.30 Meshën Shenjte në bazilikën e
Shën Pjetrit, në Solemnitetin e Dëftimit të Zotit. Gjatë kremtimit eukaristik,
menjëherë pas shpalljes së Ungjillit, parashikohet Shpallja solemne e Kumtimit të
Pashkëve, kënduar nga diakoni. Dëftimi i Zotit është festë e ngjalljes, sepse përmbushet
plotësisht në ngjarjet e Pashkëve. Në këto rrethana, dëftimi i Zotit para Mbretërve
Dijetarë, duket si akti i parë i vazhdimësisë së dëftimit e dukjeve, që përshkojnë
gjithë jetën tokësore të Jezusit. Ai, drita e botës, është caku i fundmë i historisë,
pikarritja e daljes, fundi i udhës providenciale të shëlbimit, që arrin kulmin me
vdekjen, ngjalljen e ngjitjen e Tij në qiell. Prandaj, në solemnitetin e Dëftimit
të Zotit, liturgjia parashikon edhe Kumtimin e Pashkëve, sepse Viti liturgjik përmbledh
gjithë shembëlltyrën e historisë së Shëlbimit, në qendër të së cilës është Triditëshi
i Zotit të kryqëzuar, të varrosur e të ngjallur. Shërbimi liturgjik do të kryhet
nga seminaristët e Kolegjit Urbanian “Propaganda Fide”.Ati i Shenjtë do të shugurojë
dy ipeshkvij të rinj: Nuncin Apostolik të Irlandës, imzot Çarl Xhon Braun dhe
atë të Gjeorgjisë dhe Armenisë, Marek Solzhinski. Në ritin e shugurimit, kryesuar
nga Papa, do të bashkëkremtojnë kardinajtë Tarçizo Bertone e Jozef Uiljam Levada.
Gjatë ritit, kandidatët do t’i paraqesë kardinali Mark Ojè, prefekt i Kongregatës
për Ipeshkvijtë.