SHBA: me “caucus”-et e Jouas, fillojnë primaret republikane
Filluan sot në shtetin e Jouas në SHBA-të, primaret e Partisë Republikane, nga të
cilat do të dalë kandidati, që do të sfidojë Barak Obamën në zgjedhjet presidenciale
të 6 nëntorit të këtij viti. Ekonomia është argumenti kryesor i debateve. Sondazhet
për fitimtarin e zgjedhjeve paraprake, brenda partisë, nuk japin rezultate të sigurta,
por më i favorizuari është Mitt Romney, ish-guvernator i Masaçusets, i cili qe kandidat
i republikanëve edhe para katër vjetëve. Megjithatë, qëndrimi i tij i moderuar përsa
u përket temave shoqërore dhe feja e tij mormone nuk u pëlqejnë evangjelistëve dhe
militantëve të lëvizjes “Tea Party”, pjesë e rëndësishme e bazës republikane. Sigurisht,
nëse Romney fiton në Joua, shteti i parë amerikan, ku po zhvillohen primaret, ka shanse
jo të pakta për t’u zgjedhur si kandidat edhe në shtetet e tjera. Në shtetin e dytë,
ku primaret do të zhvillohen më 10 janar, në Nju Hempshajër, ai është në krye të listës
së favoritëve.