Amerika Latine e pret Papën me gëzim e entuziazëm të madh.
Entuziazëm i madh në Meksikë e Kubë, pas shpalljes së programit të udhëtimit apostolik
të Papës, nga konferencat ipeshkvnore katolike vendore, që do të mbahet nga data 23
deri më 28 marsin e ardhshëm. Rritet entuziazmi dhe pritjet nga kjo vizitë papnore.
“Populli meksikan krenohet për këtë vizitë dhe e pret me shumë entuziazëm Papën. Ka
dëshirë të madhe ta njohë Atin e Shenjtë drejtpërsëdrejti”. Nuk e përmban emocionin.
Christophe Pierre, nunci apostolik në Meksikë, duke folur për udhëtimin e ardhshëm
të Benediktit XVI në Vendin e Amerikës Latine: “Ardhja e Papës është një shenjë e
fortë shprese” për të gjithë. Vizita e Benediktit XVI në Meksikë e Kubë përkon me
dy qind vjetorin e pavarësisë së Shteteve të ndryshme të rajonit. Kujtojmë vizitën
historike të Papës Gjon Palit II në ishullin karaibik. Duhet përmendur lidhjen
tejet të veçantë e të përzemërt që bashkonte Kubën e Meksikën me Papën Gjon Palin
II. Në rastin e Kubës për rëndësinë politike të vizitës, më 1998, që shënoi fillimin
e “përmirësimit” të marrëdhënieve ndërmjet Kishës e regjimit komunist, pas shumë vitesh
të persekutimit fetar në vend. Në rastin e Mekiskës sepse qe etapa e parë e zgjedhur
e udhëtimit të jashtëm të Papës polak më 1979. Tani, udhëtimi i Papës Benedikti XVI
në situatë të re shoqërore ka një vlerë të fortë simbolike si nga pikëpamja shpirtërore
e po kështu edhe shoqërore e kombëtare. E kujtojmë, se si sot, më 3 janar 1962,
50 vjet më parë, kur Papa Gjoni XXIII shkishëroi liderin kuban Fidel Kastro, i cili
në marsin e ardhshëm do të përshëndet ardhjen e Benediktit XVI. Shkishërimi vendosur
nga Papa Ronkali qe një përgjigje kundër dëbimit të 131 meshtarëve dhe mbylljes së
shkollave katolike në Kubë.