Сенат Уругвая прыняў
праект закона аб легалізацыі абортаў у краіне, які можа ўступіць у сілу ў гэтым годзе.
Паводле яго цяжарная жанчына можа здзейсніць аборт на працягу 12 тыдняў пасля зачацця,
пры сваім жаданні. У наступных месяцах праект закона павінен зацвердзіць парламент
краіны.
Каталіцкі Касцёл у мінулых днях шмат разоў сцвярджаў важнасць абароны
жыцця ад самага яго пачатку. “Жыццё з’яўляецца святым і боскім”, - напісаў у адкрытым
лісце да сената Уругвая, Хайме Фуэнтес, біскуп Мінаса. У лісце іерарх запытаў сенатараў:
“што яны хочуць зрабіць з законам аб аборце. Ці не хопіць насілля, якое бачым штодня
ў краіне? Хочаце забіць галоўнае жыццё: якое знаходзіцца ва ўлонні маці?”.
Біскуп
адзначыў у сваім лісце, што ў краіне ў апошніх гадах паменшылася колькасць насельніцтва.
“Ці сапраўды жыццё нявінных стане ахвярай палітыкі? Мы жывём у часах, якія патрабуюць
велічы духу. Мы павінны шукаць такія развязкі, якія з’яўляюцца найлепшымі для дадзенай
сітуацыі, і Сенат і народ Уругвая маюць магчымасць знайсці іх”, - сказаў біскуп Хайме
Фуэнтес.
Дыскусія аб добраахвотным спыненні цяжарнасці вядзецца ва Уругваі
ад некалькіх гадоў.