Lutjet mbrëmësore të Solemnitetit të Nënës së Shenjtnueshme të Zotit. Nesër 1 janar
Mesha papnore.
Sonte, duke nisur nga ora 17.00, Benedikti XVI do të kryesojë, në Bazilikën e Shën
Pjetrit, në Vatikan, Lutjet e para mbëmësore të Solemnitetit të Nënës së Shenjtnueshme
të Zotit. Pas kremtimit të Lutjeve, do të ekspozohet i Shenjtnueshmi Sakrament dhe
do të këndohet himni “Te Deum”. Është himni, përmes të cilit e falënderojmë Zotin
për ndihmën, që na ka dhënë gjatë një viti të tërë, duke na e shtrirë gjithnjë dorën
e duke e shumëfishuar forcën tonë në të vështira; e ngazëllimin, në të mira. Kremtimi
përfundon me Bekimin eukaristik. Në përfundim të një viti, e në fillim të një tjetri,
që e quajmë gjithnjë ‘të Ri’, Kisha i drejtohet Zotit, për ta adhuruar, për ta falënderuar,
për ta lavdëruar, për t’i kërkuar falje e për t’i lypur përvujtërisht bekimin. Shërbimi
liturgjik do të kryhet nga disa seminaristë të Kolegjit Papnor Ndërkombëtar “Maria,
Nëna e Kishës” si dhe nga Vëllezërit e Institutit “Miles Christi”, universitarë laikë.
Në përfundim të kremtimit, Papa do të vizitojë Shpellën e Betlehemit në Sheshin
e Shën Pjetrit. Sivjet i kushtohet posaçërisht Virgjërës Mari. Prej këndej, ka dy
skena, që na kujtojnë dy nga çastet kulmore të jetës së Vashës së Nazaretit, që do
të bëhej Nëna e Zotit: lajmërimin e Engjëllit e vizitën e Zojës në shtëpinë e Shën
Elizabetës, në çastin kur Shenjtorja e quan ‘Nëna e Zotit” e Maria i përgjigjet
duke kënduar himnin madhështor “Magnificat’, me të cilin madhëron Hyjin për të gjitha
veprat e tija. Shpella e sivjetme e Betlehemit është shenjë nderimi për Gjon Palin
II, Papën e ‘Totus Tuus”, lumnuar më 1 majin e kaluar.
Nesër, Mesha kushtuar
Nënës së Shenjtnueshme të Zotit. Në këtë ditë mariane, Mesha do të paraprihet
nga Rruzarja Shenjte. Me solemnitetin e Nënës së Zotit, festa kryesore mariane
e vitit liturgjik, përkon edhe Dita Botërore e Paqes. Mesazhi i Atit të Shenjtë për
Ditën e këtij vitit, e 45-ta, i kushtohet të rinjve. Titullohet: “T’i edukojmë të
rinjtë me frymën e drejtësisë e të paqes”. Me Atin e Shenjtë do të bashkëkremtojnë
kardinali Tarçizio Bertone, Sekretar i Shtetit të Shenjtërisë së Tij; kardinali Petere
Kodvo Apiah Turkson, kryetar i Këshillit Papnor të Drejtësisë e Paqes; imzot Gjovani
Anxhelo Beçiu, zëvendës-sekretar i Sekretarisë së Shtetit; imzot Dominik Mambertì,
sekretar për Marrëdhëniet me Shtetet; imzot Mario Tozo, Sekretar i Këshillit Papnor
të Drejtësisë e Paqes dhe imzot Luigji Çelata, Sekretar i Këshillit Papnor për Dialogun
Ndërfetar. Tekstet për lutjet universale u përgatitën nga Murgat e Vizitacionit
të Manastirit “Nëna e Kishës”, në Vatikan. Atin e Shenjtë do ta shoqërojnë, në
cilësinë e kardinajve diakonë, kardinali Andrea Kordero Lanca di Montexemolo dhe kardinali
Gjovani Lajolo. Në përfundim të kremtimit, nën tingujt e një antifone mariane,
Ati i Shenjtë do të nderojë një figure artistike të Zojës së Bekuar. Shërbimin
liturgjik do ta kryejnë seminaristët e Kolegjit Papnor “Josephinum” (Columbus,
Ohio).