Nis një Vit i Ri. E nisemi edhe ne drejt ditëve të reja, ngarkuar me të panjohura.
Të jesh gati për nisje, është një gjë e madhe. Kur di të nisesh, di edhe të arrish.
Të arrish me sukses tek caku, tek fundi i vitit, a tek një cak edhe më i largët, ai
ndërmjet jetës e përjetësisë. Duhet të jemi gati, pra, gjithnjë. Për nisje. Për të
nisur një vit të ri, për të filluar një kohë të re, e edhe për ta përfunduar, me të
njëjtin ngazëllim, që na i mbush plot zemrat në mbarim të një viti, të cilin e kemi
pushtuar me fund. Viti 2011 po shkon. Duhet të gjejmë fjalët më të përshtatshme
për ta përshëndetur, e edhe për ta pritur Vitin e Ri 2012. Kur niset Viti i Vjetër,
të duket se niset një krijesë e dashur, që e ke pasur pranë 365 ditë. Tani ngjit shkallët
e një avioni imagjinar, për të fluturuar në hapësirat e misterit. E ti kërkon urimet
më të këndshme, para se të zhduket në hapësirat e ngrira të qiellit dimëror. E nuk
i gjen dot, sepse fjalët më të ëmbla nuk thuhen kurrë me gojë, por me zemër, kur zemra
i flet zemrës. E, duke e parë Vitin e Vjetër, që fluturon, nuk mund të mos mendosh
se një ditë edhe ti do të shkosh. Po ti nuk dëshpërohesh. Je i krishterë. Kujton Fjalët
e Krishtit: “Do të shkoj, por do të vij përsëri”. Nuk është, prandaj, kurrë një lamtumirë,
pa ardhmëri, kjo që i themi Vitit të Vjetër e jetës sonë të vjetër. Ai shkon, vjen
i riu. E edhe kur ta kremtojmë atë, që do të na duket viti i fundmë mbi tokë, do
të kemi një vit të ri, në një përmasë krejt tjetër, shumë më vezulluese, se Bredhat
e Vitit 2012. Ikja jonë është plot me kthim. Prandaj ne, të krishterët, jemi gjithnjë
gati për një vit të ri e për një ditë të re, të rëndësishme, impenjative. Me këtë
frymë e përshëndesim Vitin e kaluar, në sa bëjmë hapin e parë drejt Vitit të Ri, në
pritje të viteve të tjera të reja, viteve që maten me sekonda, minuta e ditë, e viteve
që s’kanë cak. Prej këndej, fjala ‘Gëzuar’ merr një kuptim plot shpresë. E fjala
“Për shumë vjet”, ngarkohet me kuptimin “për amshim”, gjë që na bën t’i themi me gaz
në buzë ‘lamtumirë’ vitit të vjetër, që niset, e ‘mirë se vini”, viteve të reja, që
na presin, në kohën pa mbarim. Kështu e kremtojmë ne, të krishterët çdo vit të ri,
e kështu edhe i urojmë të gjithë vëllezërit e motrat e botës: “Gëzuar!” e “Për shumë
vjet!”.