Festa e Familjes Shenjte të Nazaretit. Fjalët e Benediktit XVI për familjen, udhë
e Kishës.
Kisha kremton sot Familjen Shenjte të Nazaretit, model për të gjitha familjet e krishtera.
Familja, nënvizoi Papa në audiencën e fundit të përgjithshme të vitit 2011, është
Kishë shtëpiake e duhet të jetë shkolla e parë e lutjes. Në shtëpi fëmijët, që në
moshë të njomë, mund të mësojnë të perceptojnë praninë e Zotit, falë mësimit e shembullit
të prindërve, duke jetuar në një atmosferë, ku ndjehet fort prania e Hyjit. Bukurisë
së familjes dhe vendit tepër të rëndësishëm të dëshmisë së saj për ungjillëzimin e
ri, Papa i ka kushtuar shumë reflektime gjatë këtij vitit, që po përfundon. Familja
është udha e Kishës: e bukur dhe e fuqishme figura, që përdori Benedikti XVI gjatë
fjalimit, mbajtur në mbledhjen plenare të Këshillit Papnor për Familjen, më 1 dhjetorin
e kaluar. Ashtu si në fillim të papnisë së tij, edhe sivjet, Papa i kushtoi vëmendje
të dorës së parë institutit familjar, kishë e vogël shtëpiake, që duhet të zërë një
nga vendet e para në impenjimin për ungjillëzimin e ri: “Në kohën tonë,
ashtu si në epokat e kaluara, eklipsi i Hyjit, përhapja e ideologjive që i kundërvihen
familjes dhe zvetënimi i etikës seksuale, duket se lidhen ngushtë ndërmjet tyre. E
ashtu si lidhen eklipsi i Hyjit dhe kriza e familjes, ashtu edhe ungjillëzimi i ri
është i pandarshëm nga familja e krishterë” (Fjalimi Këshillit Papnor për
Familjen, 1 dhjetor 2011). Në vitin, kur kremtohet 30-vjetori i Nxitjes Apostolike
të Gjon Palit II, Familiaris Consortio, Benedikti XVI ripohoi se familja duhet
të jetë përsëri protagoniste në jetën e Kishës e të shoqërisë: “Familja
e krishterë, kur e jeton dashurinë si bashkim e shërbim, si dhuratë reciproke, si
bashkëpunim me të gjithë, përmes kthimit të vazhdueshëm në rrugën e Zotit, e ndihmuar
nga Hiri Hyjnor, reflekton në botë shkëlqimin e Krishtit dhe bukurinë e Trinisë Hyjnore”
(Fjalimi Këshillit Papnor për Familjen, 1 dhjetor 2011). Kisha, na kujton Benedikti
XVI, përgatitet për takimin e madh të familjeve, që do të mbahet vitin e ardhshëm,
në Milano. E, ndërkaq Papa i parapriu kësaj ngjarjeje të madhe kishtare, me vizitën
në Zagreb, për Ditën botërore të familjeve katolike kroate, qershorin e kaluar. Me
këtë rast, Ati i Shenjtë i ftoi familjet ta përballojnë me guxim mendësinë e shekullarizuar,
e cila e propozon bashkëjetesën si kohë, që të përgatit për martesë, madje që mund
edhe ta zëvendësojë vetë martesën, duke kujtuar se njeriu mund të dojë pa asnjë rezervë
e të vihet në shërbim të tjetrit, ashtu si Krishti. Papa i nxiti familjet ta mbrojnë
jetën e të dëshmojnë bukurinë e dashurisë bashkëshortore: “Të dashura familje,
gëzojeni atësinë e amësinë! T’i hapësh rrugën jetës, do të thotë t’i hapësh rrugën
së ardhmes, besimit në ardhmërinë E të respektosh moralin natyror, do të thotë ta
çlirosh njeriun, në vend që ta poshtërosh. E mira e familjes, është edhe e mira e
Kishës!” (Mesha në Zagreb, 5 qershor 2011). Ati i Shenjtë kujtoi,
këtë vit, edhe teologjinë e trupit në jetën e bashkëshortëve të krishterë. Duke pritur
në audiencë anëtarët e Institutit Papnor Gjon Pali II për Familjen, Benedikti XVI
nënvizoi se joshja e vërtetë e seksualitetit lind nga madhështia e horizonteve, që
hapen nga dashuria e Zotit:“Në familje njeriu zbulon marrëdhëniet me të tjerët,
jo si individ i pavarur, por si bir, si bashkëshort, si prind, identiteti i të cilit
bazohet në thirrjen për të dashur, për të marrë nga të tjerët e për t’ua dhuruar vetveten
të tjerëve”. (Fjalim drejtuar anëtarëve të Institutit Gjon Pali II për
Familjen, më 13 maj 2011).