28 снежня ў Залі Паўла
VI у Ватыкане Бэнэдыкт ХVI сустрэўся з вернікамі падчас традыцыйнай агульнай аўдыенцыі,
апошняй ў гэтым годзе. Сваю катэхезу Святы Айцец прысвяціў месцу малітвы у жыцці чалавека.
Сёння Папа спыніўся на ролі, якую яна мела для Святой Сям’і з Назарэту.
“Дом
з Назарэта, па сутнасці, - школа малітвы, у якой мы навучаемся слухаць, разважаць
і пранікаць ў глыбокае значэнне аб’яўлення Сына Божага, бяручы прыклад ад Марыі, Юзафа
і Езуса. Застаецца памятнай прамова Слугі Божага Паўла VI падчас яго візіту ў Назарэт
5 студзеня 1964 г. Павел VI сказаў тады, што ў школе Святой Сям’і мы разумеем, чаму
павінны захаваць духоўную дысцыпліну, калі хочам прытрымлівацца навучання Евангелля
і стаць вучнямі Хрыста”, - сказаў Бэнэдыкт ХVI.
Папа нагадаў некаторыя фрагменты
Евангелля, у якіх узгадваецца аб малітве і адносінах Святой Сям’і з Богам, аб дзяцінстве
Езуса. Папа спыніўся на падзеі ахвяравання Езуса ў святыні. “Бацькі Езуса пайшлі ў
святыню, каб ахвяраваць Богу першароднае дзіця. Падарожжа Святой Сям’і - гэта пілігрымка
веры, ахвяраванне дароў, сімвал малітвы і сустрэчы з Панам, якога ўжо бачылі ў Езусе
Марыя з Юзафам”, - сказаў Пантыфік.
Святы Айцец падкрэсліў як любіла Марыя
Езуса. “У кантэмпляцыі Езусу ніхто не аддаўся з такой стараннасцю, як Марыя”, - сказаў
Папа. Пантыфік затым спаслаўся да Евангелля паводле Лукі, у якім адзначаецца, што
стаўленне Марыі да таямніцы Уцелаўлення дазваляе нам ўбачыць яе сэрца, яе веру і надзею,
паслухмянасць і малітву. “Гэтая выява Марыі з’яўляецца ўзорам для кожнага веруючага,
які зберагае словы і дзеянні Езуса”, - сказаў Папа. Ён звярнуў увагу на св. Юзафа
як на ўзор малітвы.
“Безумоўна, ён разам з Марыяй вучыў Езуса малітве. У
суботу хадзіў з Езусам у сінагогу. Юзаф, згодна з яўрэйскай традыцыяй, кіраваў дамашняй
малівай: раніцай, верачам, падчас ежы і ў часе вялікіх рэлігійных святаў. Такім чынам,
у рытме дзён, праведзеных у Назарэце, Езус навучыўся на перамену маліцца і працаваць
і ахвяраваць Богу таксама намаганні, каб зарабіць на штодзённы хлеб для сям’і”, -
сказаў Святы Айцец.
Пантыфік адзначыў, што жыццё Святой Сям’і было запоўнена
малітвай. “Сям’я з Назарэта з’яўляецца першым узорам Касцёла, у якім вакол прысутнасці
Езуса і дзякуючы Яго пасрэдніцтву ўсе жывуць у сыноўскіх адносінах з Богам, Які таксама
пераўтварае чалавечы адносіны”, - сказаў Папа.
На заканчэнне Святы Айцец адзначыў,
што Святая Сям’я з’яўляецца першай іконаю дамашняга Касцёла. “Сям’я з’яўляецца дамашнім
Касцёлам, паклікана быць школай малітвы. У ёй дзеці з ранніх гадоў павінны вучыцца
ўспрымаць Бога, дзякуючы навучанню і прыкладу бацькоў. Сапраўднае хрысціянскае выхаванне
не можа ігнараваць вопыта малітвы. Калі мы не навучымся маліцца ў сям’і, у будучыні
будзе цяжка запоўніць гэту пустату. Таму жадаю скіраваць да вас запрашэнне адкрыць
нанава прыгажосць сумеснай малітвы у сям’і праз школу Святой Сям’і з Назарэта”. –
сказаў Бэнэдыкт ХVI.