Papa nuk i harron të krishterët e persekutuar në botë
“Si në lashtësi edhe sot pranimi e aderimi i sinqertë i Ungjillit mund të kërkojë
flijimin e jetës dhe shumë të krishterë në pjesë të ndryshme të botës janë para rrezikut
të persekutimeve e shpesh herë edhe të martirizimit”. Kështu pohoi Papa Benedikti
XVI gjatë lutjes së Engjëllit të Tënzot, duke folur mbi figurën e Shën Shtjefnit,
martirit të parë të Kishës. Fjalët, ato të Papës Ratcinger, me domethënie të veçantë
pas atentateve të djeshme në Kisha në Nigeri. “Po, siç na kujton Zoti Jezus – shtoi
Papa – ‘kush do të qëndrojë deri në fund do të shpëtohet””. “Pas brezit të Apostujve
– tha Papa duke iu drejtuar besimtarëve të mbledhur në Sheshin e Shën Pjetrit në Vatikan
për lutjen e Engjëllit të Tënzot -, martirët marrin vendin e parë në vlerësimin nga
ana e Bashkësisë së krishterë. Në kohët e persekutimeve më të mëdha, lavdërimi i tyre
e përforconte udhëtimin e besimtarëve dhe inkurajonte kërkimin e së vërtetës së kthimit
të tyre tek Zoti”. Sipas Papës, “imitimi i vërtetë i Krishtit është dashuria, të
cilën disa shkrimtarë të krishterë e kanë përcaktuar si “martirizimin sekret””. Papa
iu lut Zojës së Bekuar që ta “ruajë të pacenuar vullnetin për të mirën, sidomos ndaj
atyre që na kundërshtojnë, na kërcënojnë”.