Benedikti XVI në Mesazhin e Krishtlindjes: Krishti erdhi për të na shpëtuar nga e
keqja e madhe e ndarjes prej Hyjit! Papa kujton gjithë popujt e vuajtur.
“Krishti lindi për ne, e për të na shpëtuar, sidomos, nga e keqja më e madhe, ndarja
prej Hyjit”. Këtë i kujtoi Papa mbarë botës, në mesazhin tradicional të Krishtlindjes,
duke kërkuar ndihmën hyjnore për popujt e botës, që vuajnë nga fatkeqësitë e natyrës,
nga zija e bukës, konfliktet shoqërore, luftërat. Më pas u drejtoi urimet më të përzemërta,
në gjuhët përkatëse, për t’u dhënë edhe Bekimin “Urbi et Orbi”- “Romës e Botës”. E
ndoqën mijëra shtegtarë, ardhur nga të katër anët e Planetit. Ndërmjet tyre, një mori
familjesh me fëmijë, mbledhur në Sheshin e Shën Pjetrit, në këtë ditë dimërore të
ndriçuar nga një diell i këndshëm, për të dëgjuar, së bashku me miliona besimtarë,
lidhur përmes radios, televizionit e internetit, fjalët e Papës, nga lozha qendrore
e Bazilikës së Shën Pjetrit: “I Biri i Marisë Virgjër lindi për të gjithë,
është Shëlbuesi i të gjithëve”. Pasardhësi i Shën Pjetrit uroi edhe një
herë, duke iu drejtuar mbarë botës në këto Krishtlindje… “… të arrijë
tek të gjithë jehona e lajmit të Betlehemit, të cilin Kisha Katolike e shpall sot
në të gjithë kontinentet, përtej kufijve kombëtarë, gjuhëve, kulturave”. “Eja,
na shpëto!”, u lut Benedikti XVI: “Kjo është britma e njeriut të të gjitha
kohëve, që e ndjen se nuk mund t’i kapërcejë i vetëm vështirësitë e rreziqet. Ka nevojë
për një dorë më të madhe, më e fortë, që t’ia shtrëngojë dorën e brishtë; për një
dorë, që i shtrihet nga lartësitë qiellore. Kjo dorë, shpjegoi Papa,
është Jezusi: “Ai është dora, që Zoti i shtrin njerëzimit, për ta nxjerrë
nga balta e kënetës së mëkatit e për ta ngritur përsëri në këmbë mbi shkëmb, mbi shkëmbin
e patundur të së vërtetës së Tij e të dashurisë së Tij”. Jezusi, shtoi
Benedikti XVI, u dërgua nga Ati, për të na shpëtuar nga e keqja më e madhe, e rrënjosur
në zemrën e njeriut e në histori: “nga ajo e keqe, që është ndarja
prej Zotit, nga kryelartësia fodulle për të mos u varur nga askush, për të konkurruar
me vetë Hyjin, për t’i zënë vendin, për të vetëvendosur ç’është e mirë e ç’është e
keqe, për të qenë zot i jetës e i vdekjes”. Kjo është e keqja më e madhe,
mëkati më i madh, nga i cili ne, njerëzit, nuk mund të shpëtojmë, në se nuk e lëshojmë
plotësisht veten në dorë të Zotit. E kjo vetëdije na krijon kushtet e duhura, na bën
ta njohim vetveten: “Ai është mjeku, ne, të sëmurët. Pranimi i kësaj së
vërtete, është hapi i parë drejt shëlbimit, drejt daljes nga shtegu i verbër, ku
na shtyu fodulleku ynë”. Në qendër të vëmendjes së Papës, në këtë ditë
të madhe feste, popujt që vuajnë në të katër anët e Planetit: “Eja, na shpëto!”
E përsërisim këtë thirrje në bashkim shpirtëror me shumë njerëz, që jetojnë në kushte
tejet të vështira, e duke u bërë zë i atyre, që nuk kanë zë”. Mendimi i
Beneditit XVI shkoi tek popujt e Bririt të Afrikës, që vuajnë nga uria e nga thatësira,
të rënduara shpesh edhe nga pasiguria e vazhdueshme e tek refugjatët e shumtë, të
lënduar thellë në dinjitetin e tyre, me ftesën drejtuar bashkësisë ndërkombëtare për
ndihmë e solidaritet. Më pas, kujtoi popullsitë e Jug-Lindjes aziatike, porsaçërisht
ato të Tailandës e të Filipineve, që kalojnë ende kohë të vështira për shkak të përmbytjeve;
njerëzimin e plagosur nga një mori konfliktesh, që vijojnë ta gjakosin Planetin; i
ftoi izraelitët e palestinezët të vijojnë dialogun; kërkoi fundin e dhunës në Siri;
pajtimin edhe stabilitetin e plotë në Irak e Afganistan; veprimtari të reja për të
mirën e përbashkët të të gjithë anëtarëve të shoqërisë në Vendet e Afrikës së Veriut
e të Lindjes së Mesme e, akoma, dialog e bashkëpunimin në Mianmar, për gjetjen e rrugëzgjidhjes
së përshtatshme; stabilitet politik në vendet e zonës afrikane të Liqeneve të Mëdha
dhe mbrojtje të të drejtave të të gjithë qytetarëve në Sudanin e Jugut. Papa i
ftoi të gjithë t’ia ngulin sytë Shpellës së Betlehemit, me bindjen se Foshnja, që
kundrojmë, është shpëtimi ynë! “Ai solli në botë mesazhin universal të pajtimit
e të paqes. T’ia hapim zemrat, ta përbujmë në jetën tonë”. Pastaj, përshëndetja
në 65 gjuhë, duke nisur nga romakët e italianët, me urimin që lindja e Krishtit dhe
Fjala e Ungjillit ta përtërijnë jetën e besimtarëve, të sjellin paqe në familje, ngushëllim
në vatrat e njerëzve që vuajnë, gëzim në të gjitha zemrat njerëzore! Papa e mbylli
mesazhin me lutjen në gjuhën latine: “Veni ad salvandum nos!”- “Eja, na shpëto”.Në
përfundim, bekimi apostolik “Urbi et Orbi”- Romës dhe Botës.