Krishtlindja troket në portat e zemrave tona, të përshpejtojmë përgatitjen për t’i
bërë vend Zotit që po vjen.
Të nderuar, vazhdojmë përgatitjet e fundit për Krishtlindje me një mendim të shkurtër
e të thjesht shpirtëror. Vetëm edhe 24 orë na ndajnë nga festa e madhe e Lindjes së
Krishtit, e këndej të përshpejtojmë përgatitjen e zemrës për t’i bërë VEND ZOTIT që
po vjen. Festa e Krishtlindjes na thotë se të gjithë kemi nevojë të kthehemi vazhdimisht
tek misteri i mishërimit të Hyjit, tek misteri i Krishtit, që të na hyjë në shpirt
deri në atë pikë, sa të mund të themi se jemi vërtetë të krishterë, që do të thotë
njerëz të cilët kanë aromën e Krishtit. Koha e Ardhjes që përjetuam këtyre katër
javëve, niset nga Lindja e Zotit, nga ardhja e Jezusit në histori e kohë njerëzore
për të hapur brenda kësaj historie e kohe, të pushtuar nga errësira, njollosur nga
egoizmit, nga padrejtësia e nga mëkati, një shteg shpëtimi. Ne e dimë se kjo tashmë
ka ndodhur, se Biri i Zotit është Mishëruar, është bërë Njeri, e po kështu e dimë
se shëlbimi ende nuk ka përfunduar së përmbushuri, shëlbimi pra nuk është kryer, nuk
ka përfunduar; shëlbimi Hyjnor ka filluar, si tharm, si fryt i parë e duhet të vazhdojë
në historinë tonë personale. Ne presim kthimin e Jezusit, që të përmbushet shëlbimi
Hyjnor, që njerëzimi e çdo njeri të çlirohet plotësisht nga pesha e errësirës, e egoizmit,
e fajit dhe bota të lirohet nga skllavëria e mëkatit. Ne presim qiej të lind një tokë
të re, ndërsa kujtojmë ardhjen e Jezusit në histori, ndezim kandilin, apo më mirë
të themi e mbushim me vaj – për të dal para si duhet të përgatitur në takim me Zotin
që vjen për dashuri e me dashuri. Ekziston vetëm një mënyrë për të kremtuar vërtetë
Lindjen e Krishtit: hapjen e zemrës sonë për ti mundësuar ende sot, edhe një herë
Zotit të mishëruar në jetën time, të bëhet Një me mua. Këtë le të kërkojmë sivjet
për Krishtlindje, që ardhja e Jezusit të jetë për të gjithë gurrë shprese, guximi,
drite e jete. Për shumë Mot Krishtlindjen!