Лацінскі Патрыярх Іерусаліма: мір і згода на Блізкім Усходзе
21 снежня лацінскі
Патрыярх Іерусаліма, арцыбіскуп Фуад Тваль у сваім калядным пасланні пажадаў жыхарам
Святой Зямлі “надзеі і міру ў сэрцах, у сям’і і паміж народамі”. Іерарх адзначыў,
што здарэнні, якія даюць аптымізм, гэта поступ у міжрэлігійным і экуменічным дыялогу.
“Малітоўная сустрэча ў Асізі, у якой прыняло ўдзел каля 300 рэлігійных лідэраў з цэлага
свету, гэта важны крок сумеснага сведчання на карысць міру і згоды”, - сказаў арцыбіскуп
Тваль.
Патрыярх выказаў сваю заклапочанасць па прычыне сітуацыі хрысціян у
краінах Блізкага Усходу, у якіх адбылася “арабская вясна”. “Я маю надзею, што ўласцівыя
органы ўздымуць дзеянні, каб прадухіліць насілле і абараніць рэлігійныя меньшасці,
якія становяць інтэгральную частку грамадства”, - адзначыў лацінскі Патрыярх Іерусаліма.
Іерарх
у сваім калядным пасланні ўзгадвае ізраільска-палестынскі канфлікт. Арцыбіскуп Тваль
прыпамінае, што Апостальская Сталіца падтрымлівае імкненні абодвух народаў мець уласную
дзяржаву і жыць бяспечна ў межах, якія прызнае міжнародная супольнасць. Патрыярх падзякаваў
душпастырам і рэлігійным супольнасцям за паслугу на карысць мясцовых хрысціян і эмігрантаў,
якія прыбываюць ў Ізраіль.