Kalendari i kremtimeve liturgjike festive, që do të kryesohen nga Papa.
Kremtimet tradicionale në Vatikan, karakteristike për këtë kohë, kanë nisur tashmë
me takimin e parë, në zemër të Romës: vizitën e 8 dhjetorit, në Sheshin e Spanjës,
ku Papa shkoi për të nderuar Zojën e Papërlyer. Pasuar edhe nga takime të tjera. Iu afruam, kështu, Natës të Lindjes së Krishtit: Natën e Krishtlindjes,
në orën 22.00, Papa do të kremtojë Meshën e Mesnatës në Bazilikën e Shën Pjetrit.
Të nesërmen, nga Lozha qëndrore e Bazilikës së Vatikanit, në orën 12.00, bekimi
‘Urbi et Orbi’ – ‘Romës e Botës’, transmetuar nga mondovizioni. 2011-ta do të përfundojë
më 31 dhjetor në Bazilikën e Vatikanit. Papa do të kryesojë Lutjet e para Mbrëmësore
të Solemnitetit të të Shenjtnueshmes Mari, Nënës së Zotit dhe ‘Te Deum’, lutjen e
falënderimit drejtuar Hyjit në fund të vitit civil. Më 1 janar 2012, duke
nisur nga ora 09.30, Benedikti XVI do të kryesojë Meshën Shenjte të Solemnitetit të
të Shenjtnueshmes Nënës së Zotit, po në Bazilikën e Shën Pjetrit, prej nga do të përhapet
në mbarë botën mesazhi papnor për Ditën e 45-të Botërore të Paqes 2012. Është një
ditë, ndikimi i së cilës, sipas dëshirës së Papës, duhet të zgjasë tërë vitin, e prandaj
Ati i Shenjtë i fton të gjithë ta lexojnë mesazhin e të thellohen në kuptimin e fjalëve,
që përbëjnë titullin e tij: “Të edukohen të rinjtë me frymën e drejtësisë e të
paqes”. Të marten, më 6 janar, solemniteti i Dëftimit të Zotit, Papa
do të kryesojë Meshën në Shën Pjetër, duke nisur nga ora 09.30. Gjatë kremtimit, do
të shugurojë dy ipeshkvij: Nuncin Apostolik të Irlandës, imzot Çarl Xhon Braun dhe
atë të Gjeorgjisë dhe Armenisë, Marek Solzhinski. Më 8 janar, festa e Pagëzimit
të Zotit, duke respektuar traditën e papnisë së tij e të Papës Vojtila, Benedikti
XVI do t’ i japë sakramentin e Pagëzimit një grupi fëmijësh, gjatë Meshës së paradites,
në Kapelën Sikstine. Pagëzimet, në kapelën mahnitëse, afreskuar nga Mekelanxhelo,
do të jenë kremtimi i parafundit i Kohës së Krishtlindjes. Takimi i fundit, të
mërkurën, më 25 janar, në orën 17.30, në solemnitetin e Kthimit të Shën Palit.
Benedikti XVI do të përfundojë Javën e Lutjes për bashkimin e të krishterëve, duke
kryesuar Lutjet Mbrëmësore në Bazilikën romake të Apostullit të Popujve jashtë Mureve.