Ուրբաթ, 16 դեկտեմբեր 2011-ին, Լիբանանի մօտ Սպանիոյ դեսպան Խուան Քարլօ Կաֆօ, Սպանիոյ
կառավարութեան անունով պարգեւատրեց «Isabelle-la-Catholique» կարգի շքանշանով, ազգային
պետական երաժշտանոցի կիթառի փրոֆէսոր՝ Ժոզէֆ Եղիա Իշխանեան, Սպանիոյ նկատմամբ իր կատարած
ծառայութիւններուն համար: Այս առթիւ, Սպանիոյ դեսպանը յայտնեց որ «Isabelle-la-Catholique»
կարգի շքանշանը (ստեղծուած՝ 1815-ին) կը ստանան այն սպանացի կամ օտար անձնաւորութիւնները,
որոնք բացառիկ ներդրում ունեցած են, քաջալերելով բարեկամութեան ու համագործակցութեան
կապերը Սպանիոյ եւ միջազգային հանրութեան միջեւ: Ան աւելցուց, որ փրոֆէսոր՝ Ժոզէֆ Եղիա
Իշխանեան, այս իւրայատկութիւնը ունեցաւ ապրելու եւ ներշնչուելու Սպանիոյ դասական կիթառի
մեծ յօրինողներէն, շնորհիւ իր վճռակամութեան ու սիրոյ կիթառին հանդէպ: Սպանիոյ Դեսպանը
բարձր գնահատեց Իշխանեանի սէրը սպանական մշակոյթին հանդէպ, կիթառին բարձր արհեստավարժութիւնները
ներկայացնելով լիբանանեան հանրութեան 1970 թուականէն սկսեալ: