Papa Veprimit Katolik të të Rinjve: miqësia me Jezusin nuk do t’ju zhgënjejë kurrë!
Gëzimi, që buron nga miqësia me Zotin, ishte në qendër të vëmendjes në audiencën e
sotme të Benediktit XVI me një delegacion të Veprimit Katolik të të Rinjve Italianë,
që u prit në Vatikan për urimet e Krishtlindjes. Papa i ftoi të rinjtë e shoqatës
katolike t’i nxisin edhe shokët e tyre të njihen me bukurinë e Ungjillit dhe i inkurajoi
të impenjohen bujarisht në ndihmë të atyre, që kanë më pak fat në jetë. Të
jeni gjithnjë gati për t’iu përgjigjur thirrjes së Jezusit: Benedikti XVI e mori shtytjen
nga tema e sivjetme e Veprimit Katolik: “Çohu, po të thërret!”, për t’u ofruar të
rinjve të shoqatës, një reflektim kushtuar bukurisë së Zotit dhe miqësisë me Të. Thirrja
për t’u çuar në këmbë, që Jezusi i bën Bartimeut, tha Papa, na kujton thirrjen që
prindërit u bëjnë çdo mëngjes fëmijëve, që të çohen e të nisen për në shkollë. Nganjëherë,
shtoi Ati i Shenjtë, nuk është e lehtë t’i përgjigjesh një thirrjeje të tillë: “Unë
ju ftoj që jo vetëm të jeni gati, por të shikoni edhe se brenda kësaj fjale, që përsëritet
ditë për ditë, është thirrja e dikujt që ju do, është thirrja e Hyjit për të jetuar,
për të qenë të krishterë, për të filluar një ditë të re, dhanti e madhe e Tij, për
të takuar miqtë e shumtë, për të mësuar, për të bërë mirë e edhe për t’i thënë Jezusit:
të falënderoj me gjithë zemër për gjithçka, që më jep”. Në mëngjes, kur
ngriheni nga krevati, shtoi Papa, kujtojeni me një lutje edhe Mikun e Madh, Jezusin.
Shpresoj se e bëni këtë çdo ditë. I ftoi, kështu, të rinjtë, ta vlerësojnë dhuratën
më të madhe, atë të jetës, e t’i kërkojnë Zotit t’i japë një jetë plot me gëzim çdo
të riu a të reje në mbarë botën. T’i luten, që të respektohen të gjithë e të mos i
mungojë askujt gjithçka është e nevojshme për jetesë. Foli, pastaj, për miqësinë me
Jezusin, i cili i shoqëron të rinjtë gjatë gjithë rrugës së jetës: “Të
dashur të rinj e të reja të Veprimit Katolik Italian, përgjigjjuni bujarisht Zotit,
që kërkon miqësinë tuaj. Nuk do t’ju zhgënjejë kurrë. Ndoshta do t’ju thërrasë t’ia
dhuroni vetveten shokut a shoqes, për të formuar së bashku një familje, por ndoshta
mund t’ju thërrasë për t’ia dhuruar gjithë jetën Atij vetë e të tjerëve, si meshtarë,
rregulltare, misionarë e misionare”. Papa u dha zemër të rinjve të impenjohen
në ndihmë të bashkëmoshtarëve më nevojtarë: “Të jeni gjithnjë të ndjeshëm
ndaj atij, që ka nevojë për ndihmë; ndiqni shembullin e Jezusit, i cili nuk e linte
askënd vetëm për vetëm me problemet e tij, por i rrinte gjithnjë pranë, ndante me
të të mira e të vështira, e mbështeste, i jepte forcën e paqen e Hyjit”. Prej
këndej, i nxiti të rinjtë e VKRI t’u çojnë bashkëmoshtarëve ftesën e Zotit për t’u
bërë miqtë e Tij, t’u tregojnë bukurinë e lutjes e të dëgjimit të Ungjillit. Në përfundim,
një urim i veçantë për Krishtlindjen, tashmë fare pranë: “Krishtlindja,
që ju uroj, është kjo: kur të bëni Shpellën e Betlehemit, mendoni se po i thoni Jezusit:
eja në jetën time e unë do të të dëgjoj gjithnjë”.