Atë Pjetër Meshkalla : Krishtlindje në Shkodër 1909
Mbas vitit 1909 qeveria Turke në Shkodër, për shkak të lëvizjeve shqiptare për liri
(pushka - vëlonte, shpesh deri në afërsitë e qytetit) i ndaloi disa çfaqje tradizionale
“Të Natës së Këshnellave”, duke i hjekë diçka të bukur e të vlefshme poezisë se Festës. Dha
lajmin kumbona me tinguj argjandi, theu muzgun jehona, gjithë zemrat i
trandi: vinë festat e lume, Krishtlindje e bekueme, me shëndet e me gëzim!
Kumbonat e randa, kumbonat e lehta këndojnë me të pasë anda me notat e
veta: ushtojnë Kumbonaret, larg zani përdarët tue ra pa pushim….
Sa kandshëm dikohet kjo valë e harmonisë, krejt shpirti naltohet ndër
sfera të hyjnisë: kah shpresa e ngushëllimit, kah rrezja e shpëtimit, drejt
pagjës që vjen! Në atë kupen qiellore o hyje xixilloni, o male, prej
bore në dritë të hanës zbardhoni, që zemrat e dlira të gëzojnë, vullnet
mira me atë fe që na ushqen. Tarabat kërcasin, po mbyllen dyqanet, gra
e burra hitasin, vrapojnë përgjith-an’ët: përshëndetje e përgëzime, ma
të bukrat urime gjatë rrugës ndigjon. Tash hargjet e mbrame s’ka mbetë
kush pa i krye, gjithkush do në këtë mbrame, në shtëpi nguthshem
me u kthye: shegerti e tregtari, ngarkue, prej Pazari ma thekshem vrapon,
Plot dritë janë shtëpijat plot zjarmi te oxhaku, pëlcasin dëllinjat, luejn
fëmia te praku, e gratë nuk pushojnë, pa da vijnë e shkojnë, vëlon puna
gjithkund… Në familje krye-parë ke sonte gjithë të mirat, në ato mesatare plotësohen
dëshirat; po ende unë fukaraja në këto festa të mdhaja do të gëzoj
edhe unë! Pak baba fitimet, pak qiti edhe nana, e shkreta, kursimet
për të blemun do gjana; por… erdhi te dera dikush e, si era, la’
i shportë edhe shkoi. Vetë bana “Betlemin”: sa i bukur që më doli! s’e
ka kush si temin në mahall’n “Gjuhadol”: me dërrasa e pëlhura, me letra
e piktura ka kohë që unë punoj. E tash, q’e mbarova unë punen të tanë, ke
baba flut’rova me nanën e vëllanë, njërendi tue shkue gjithë së bashku
me u vu te votra “ në gjuj të mdhaj”. Dhe ngrihet im atë qirinë ndezë
atëherë, premton ndonjë uratë dhe ulet me tjerë, në sa na me ngadalë e
flasim pa u ndalë uratën si ai… Por mue nuk më zë vendi, lëshoj zanin
e hollë, -më rrahë zemra prej shëndi -, tham vjershat si në shkollë, -nga
Prindët - temenà - -andej - edhe këtej. E këthehëm të rrokë prinden… por
baba ka ulë kryet, e nana merr kinden e shpejtë i fshinë sytë… nuk dijë
çka u ka zemra, por mua më dridhet thembra, më vlon gjaku nder dej……
A thue janë lot gëzimi? a por janë lotë malli? o ndoshta asht pikëllimi pse
mbëlue na ka halli në këtë të shkretë jerevijë përdhese vorfënije si Krishti
në Stan?! Por çka! Jezun kemi ndër zemra të vajtueshme; të ngrohun
na jemi me hire të hyjnueshme: i drejti në këtë jetë ka pagj’n e vërtetë, që
të tjerët nuk e kanë. Me Jezun na kjajmë, e gëzimet ma të thellat me
Jezun i ndajmë: e i lusim Këshndellat me aqë të mira që Zoti na i fali
në ditë soti, me Jezun e Lumë! Oh, sa ambël sahati rrjedh sonte në
strehë tonë! kaq ambël!... por s’ngjati ra’i tingull… kumbonë… Mesnatë!
– Kris batarja, jehon Kumbonarja, vëlon pushka ma shumë… Në këto vala
festuese gjithë zemrat na qeshën, si rryma vershuese njerëzia rrugës
ndeshën, kumbon’t ajrin çajnë, e pushkët nuk ia ndajnë për festën që
na erdh’. Na pret Kisha e Madhe krejt mbushë me kandile vijnë rradha
mbas rradhe me tuba familje, e në Kishë, prej pesë portash, çdo
moshë e gjithë ortash mbrendë populli u dherdh. Sa dritat, si ylberi! sa
janë të mallngjyeshme! sa priften te Elteri me petka të shkëlqyeshme! timiani
me shtille naltohet drejt qielle fjollë-fjollëza plot! Shkon lart
si timiani, urata e lirë,
i kangës ushton zani, me Engjujt e
mirë:
“Ka linduen Mesia, vjen pagja e dashnia
L u m n i t ë n a l t i t Z O T !”
Krishtlindje në Shkodër -1909 Ate
Pjeter Meshkalla S.J. në vitin 1950 e shkroi këtë vjershë në Burgun e Burrelit të
Mirditës.