Папа прысутнічаў на трэцім адвэнтавым казанні айца Канталамесы
16 снежня Бэнэдыкт
XVI, разам з супрацоўнікамі Рымскай курыі, прысутнічаў на трэцім адвэнтавым казанні
айца Раньеро Канталамесы, прапаведніка Папскага дому. Сваё разважанне італьянскі капуцын
прысвяціў евангелізацыі амерыканскага кантынента. Ён адзначыў, што місіянеры, якія
прыбывалі ў Амерыку “былі ўпэўнены ў неабходнасці ахрысціць як мага больш людзей за
кароткі прамежак часу, каб гарантаваць ім знешняе збаўленне”. Айцец Канталамеса падкрэсліў,
што так не было ў часы першага хрысціянства: у той час евангелізацыя была скіравана
ў першую чаргу да членаў Касцёла, і толькі калі хрысціянства стала дзяржаўнай рэлігіяй,
пачалося актыўнае хрышчэнне юдэяў і язычнікаў.
Акрамя таго, айцец Канталамеса
нагадаў, што евангелізацыя Амерыкі мела, як светлыя так і цёмныя моманты, суправаджалася
правільнымі і памылковымі ўчынкамі. Капуцын падкрэсліў, што сярод прыбыўшых на адкрыты
Калумбам кантынент былі тыя, хто шукаў прыгодаў і багаццяў, але таксама і шматлікія
законнікі-місіянеры, якія “не прыходзілі, каб браць, але, каб даваць; жадалі заваёўваць
душы для Хрыста, а не для караля Іспаніі, нават калі і былі патрыётамі сваёй краіны”.
Айцец
Канталамеса адзначыў, што сёння, у кантэксце новай евангелізацыі ў Лацінскай Амерыцы,
існуюць праблемы, звязаныя, перш за ўсё, з пошукам баланса паміж сацыяльнай дзейнасцю
Касцёла і абвяшчэннем веры, а таксама з празелітызмам з боку шматлікіх сект. Каб адказаць
на гэтыя выклікі прапаведнік заклікаў углядацца ў прыклад першых місіянераў і імкнуцца
злучыць клопат аб матэрыяльным дабрабыце насельніцтва са збаўленнем іх душаў, а таксама
праз экуменічны дыялог з іншымі існуючымі на кантыненце хрысціянскімі Цэрквамі спрыяць
барацьбе з сектамі.