Nesër në Madrid, lartohen në nderimet e elterit 22 martirë
Kremtohet nesër në Madrid, riti i lumnimit të Francisco Esteban Lacal e të 21 shokëve
të tij, nga Kongregata e Misionarëve Oblatë të Zojës së Papërlyer, si edhe ai i Candido
Castàn San José, laik e baba me fëmijë, që të gjithë martirë. Liturgjia eukaristike
do të fillojë në mesditë e do të kremtohet nga prefekti i Kongregatës për Çështjet
e Shenjtorëve, kardinali Angjelo Amato, përfaqësues i Atit të Shenjtë, në bashkëkremtim
me kardinaj, ipeshkvij e meshtarë të tjerë nga Spanja, SHBA-të, Venezuela e Paraguaji.
Për ta njohur sadopak këtë grup martirësh spanjollë, i drejtuam mikrofonin pikërisht
kardinalit Angjelo Amato: Janë një baba
me fëmijë dhe 22 misionarë oblatë të Zojës së Papërlyer: Eprori Provincial, meshtarët,
rregulltarët dhe të rinjtë studentë të filozofisë e të teologjisë. Nuk ishin kriminelë.
Nuk kishin bërë asgjë të keqe. Përkundrazi, dëshira e tyre e vetme ishte të bënin
mirë e t’u shpallnin të gjithëve Ungjillin e Krishtit, i cili është lajm i mirë i
paqes, i gëzimit e i vëllazërimit. U vranë në furinë antikatolike të vitit 1936, që
e goditi Spanjën si një rrebesh gërryes acidi, i cili, në zemrat e disave, thau krejtësisht
çdo burim, nga mund të rridhte ndopak humanitet. Cili është mesazhi që na
lënë këta martirë? Martirët e çdo kohe janë dëshmitarë të çmuar të asaj jete
njerëzore, që i përgjigjet brutalitetit të persekutuesve e të vëllavrasësve me butësinë
e guximin e burrave të fortë. Pa armë, vetëm me energjinë e parezistueshme të fesë
në Zotin, ata fituan mbi të keqen, duke na lënë trashëgim të mirën për të gjithë ne.
Gjakatarët janë harruar, ndërsa viktimat e tyre të pafajshme kujtohen e kremtohen. A
mund të na thoni diçka për oblatët? Shumica e tyre janë të rinj rregulltarë
të Oblatëve të Zojës së Papërlyer, që Zoti i pati thirrur ta ndiqnin, për të qenë
misionarë të paqes ndër njerëz. Pascual Alàez Medina, për shembull, ishte vetëm 19
vjeç. Lindi në maj të vitit 1917 në provincën e Leonit. Që 12 vjeç hyri në seminarin
e oblatëve dhe në moshën 18 vjeçare mori kushtet e para të varfërisë, pastrisë dhe
bindjes. Ishte i mirë dhe entuziast për thirrjen e tij. Vetëm 6 ditë pas përtëritjes
së parë të kushteve, u kap dhe u vra. Edhe më i ri ishte Clemente Rodriguez Tejerina,
lindur edhe ai në provincën e Leonit, në korrik 1918. Ëndërra e tij - të shkonte në
mision. U martirizua në Paracuellos del Jarama në nëntor 1936. Ishte vetëm 18 vjeç.
Në dhjetor të atij viti, e motra, Josefa, duke mos ditur gjë për vdekjen e të vëllait,
me dëshirën për ta vizituar, mësoi nga ushtarakët se “ishte liruar më 28 nëntor”.
Në Konsullatën e Kilit i thanë se të gjithë njerëzit “e liruar” më 27 e më 28 nëntor
të vitit 1936, në të vërtetë ishin pushkatuar. Vaji i mijëra nënave nuk mund ta lehtësojë
dhimbjen e Kishës për humbjen e këtyre bijve të saj, rënë për shkak të urrejtjes kundër
Zotit. Fatkeqësisht, historia na mëson se kur njeriu i çrrënjos nga ndërgjegjja Urdhërimet
e Tënzot, këput edhe fibrat e së mirës, që ka në zemër, duke arritur në gjeste të
tmerrshme. Kur humb Zotin, njeriu humb edhe humanitetin e vet.