Mesazh i Papës për Napolin në përfundim të jubileut lokal: përballojini problemet
me forcën e fesë
“Mund të ecni me entuziazëm të ripërtërirë e të përballoni me forcën e fesë, të shpresës
e të dashurisë, problemet e shumta e të ndërlikuara, që takohen në jetën e përditshme”:
kështu thotë Benedikti XVI në videomesazhin, që i drejtoi sot kryedioqezës së Napolit
në Itali, me rastin e mbylljes së Jubileut lokal, shpallur nga kardinali Kreshencio
Sepe. Viti jubilar ishte për Kishën në Napoli, kohë e zhytjes në misterin e Zotit,
prandaj ishte një vit hiri. Ai mund të krahasohet me Pagëzimin – vazhdon Papa – sepse
në një farë kuptimi hapi qiellin sipër jush dhe bëri të zbresë forca e Shpirtit të
Shenjtë. “Po – thekson Benedikti XVI – qielli është i hapur sipër jush! Pas këtij
Jubileu, përtërijeni shpresën, lëreni veten të udhëhiqeni nga forca e Shpirtit Shenjt
e bashkëpunoni me hov të ri në misionin e Kishës, secili duke nxjerrë fryte nga dhuratat
e marra, duke i vënë në shërbim të të tjerëve e të krejt bashkësisë, pa personalizma
e rivalitete, por me frymën e përvujtërisë së sinqertë e të vëllazërisë plot gëzim”.