Бэнэдыкт XVI прыняў даверчыя граматы новых паслоў пры Апостальскай Сталіцы
15 снежня Бэнэдыкт
XVI прыняў даверчыя граматы новых паслоў пры Апостальскай Сталіцы, дыпламатычных прадстаўнікоў:
Рэспублікі Трынідад і Табага, Швейцарыі, Бурундзі, Тайланда, Пакістана, Мазамбіка,
Кыргыстана, Андоры, Шры-Ланкі і Буркіна-Фасо. Традыцыйна Папа звярнуўся да прысутных
дыпламатаў з прамовай, у якой адзначыў, што ў сённяшнім свеце, дзякуючы новым сродкам
камунікацыі, эканамічным сувязям, інтэнсіўнаму перамяшчэнню людзей, адчуваецца, як
ніколі, адзінства чалавечай сям’і. Святы Айцец заклікаў не шукаць у гэтых феноменах
пагрозы, але наадварот, адкрыць вялікія магчымасці, якія заключаюцца ў шчырай сумеснай
працы. “Мы ўсе адказныя адно за аднаго, і таму неабходна спрыяць умацаванню салідарнасці”,
- сказаў Пантыфік.
Папа падкрэсліў, што салідарнасць павінна існаваць таксама
паміж пакаленнямі. “Яна мае свае карані ў сям’і, якая павінна падтрымлівацца і, такім
чынам, выконваць сваю ролю ў жыцці грамадства”, - сказаў Святы Айцец. Асаблівую ўвагу
Пантыфік звярнуў, на неабходнасць выхавання моладзі і вырашэння шматлікіх сацыяльных
праблем, якія ёй пагражаюць, такіх як беспрацоўе, гандаль наркотыкамі, злачыннасць.
“Клопат аб будучых пакаленнях, будзе спрыяць адзінству чалавечай сям’і”, - сказаў
Папа.
Бэнэдыкт XVI адзначыў, што ў сённяшнім свеце распаўсюджана меркаванне,
паводле якога, культурная і рэлігійная разнастайнасці з’яўляюцца тупіком для чалавецтва.
“Плюралізм культур і рэлігій не супярэчыць агульным імкненням да праўды, дабра і прыгажосці”
- падкрэсліў Святы Айцец. Акрамя таго, Папа адзначыў, што “мір, а таксама сацыяльная
і рэлігійная гармонія не залежаць толькі ад справядлівай і адпаведнай заканадаўчай
базы, але і ад маральных якасцяў кожнага грамадзяніна”, таму задачай палітыкаў і ўсіх,
хто мае адказнасць на розных узроўнях, з’яўляецца спрыянне інтэгральнаму развіццю
кожнага чалавека.
Папа пажадаў новапрызначаным паслам плённай працы і запэўніў
у неабходнай падтрымцы і неабходнай дапамозе з боку супрацоўнікаў дыкастэрый Апостальскай
Сталіцы.