“Homo caritatis”. Праблема духоўных сродкаў у варварскім грамадстве
Мы працягваем знаёміцца
з этыка-палітычнай філасофіяй Жака Марытэна, хрысціянскага філосафа, думкі якога паўплывалі
на ўсё каталіцкае навучанне, у тым ліку і сацыяльнае. Нагадаю, што нашы разважанні
грунтуюцца на найбольш сістэматызаванай працы Марытэна, якая называецца “Чалавек і
дзяржава”. У мінулай праграме мы пачалі размову аб духоўных сродках палітычнай барацьбы.
Нагадаю, што Марытэн ставіць за прыклад эфектыўнай барацьбы народа з дамінаваннем
і злоўжываннямі з боку дзяржавы “Сацьяграху” – прынцып мірнай барацьбы Гандзі. Тлумачачы
навучанне Гандзі праз прызму філасофіі св. Тамаша з Аквіну Марытэн кажа, што мацнейшай
зброяй з’ўяляецца не нападзенне, але цнатлівая мужнасць – мужнасць у пакутах і цярпенні.
Прырода
таталітарнай дзяржавы
У нашай сённяшняй праграме мы пагаворым аб
праблеме сродкаў палітычнага жыцця ў рэгрэсіўным ці варварскім грамадстве. Пад такім
грамадствам Марытэн разумеў жыццёвы ўклад у таталітарных краінах. Ён адзначае, што
таталітарная дзяржава па сваёй прыродзе падаўляе любыя сродкі, з дапамогай якіх народ
мог бы кантраляваць ці назіраць за ёй. У такой сітуацыі ён пазбаўлены якіх-небудзь
законных ці інстытуцыйных сродкаў рэальнага кантроля над дзяржавай; таталітарная дзяржава
з’яўляецца патэрналісцкай; з яе пункту гледжання народ – гэта дзеці, якія не ведаюць,
што для іх добра, і таму толькі дзяржава абавязана зрабіць іх шчаслівымі.
Праблема
абцяжарваецца тым, што ўсе сродкі адукацыі ці ўплыву на грамадскую думку ў таталітарнай
дзяржаве, знаходзяцца пад кантролем дзяржавы. Што тычыцца сродкаў духоўнай барацьбы
– то іх можна знішыць разам з тымі, хто можа імі карыстацца. На самой справе, поспех
Гандзі быў магчымы толькі ва ўмовах адноснай свабоды, якую падараваў жыхарам калоніі
англійскі ўрад, а таксама дзякуючы старой ліберальнай арыстакратычнай традыцыі і памылковай,
цынічнай веры ў тое, што Гандзі можна было маніпуліраваць. Такім чынам, тое, да чаго
вядзе ўнутраная логіка таталітарнай дзяржавы – гэта не рэвалюцыя, якая напрыканцы
дасць народу кантроль, але поўны распад, выкліканы паступовым разбэшчваннем сумленняў
людзей у такой дзяржаве.
Канцэнтрацыйны сусвет
Каб больш дакладна
зразумець, аб чым ідзе гаворка, Марытэн прыводзіць прыклад з жыцця ў канцэнтрацыйным
лагеры – таго, што было названа канцэнтрацыйны сусвет. Напрыклад, Бухенвальд быў не
толькі месцам дзе забівалі людзей, але і грамадствам, дакладней жахам грамадства,
дзе заваяванне ўлады было пытаннем жыцця і смерці, як гэта паказала барацьба паміж
зялёнымі і чырвонымі, гэта значыць, паміж крымінальнымі злачынцамі і палітычнымі вязнямі.
Сумленны
чалавек, які жыў у такіх умовах павінен быў выбраць для сябе адну з супрацьлеглых
пазіцый: ён мог адмовіцца ад удзелу ў дзейнасці, якая была несумяшчальна з маральнымі
прынцыпамі: гэта шпіянаж, падман, здрадзніцтва, супрацоўніцтва з прыгнятальнікамі
і катамі, не гаворачы ўжо аб здзеках над суседзямі-вязнямі ці забойствах. А мог і
наадварот – пакінуць у баку маральны закон і выкарыстоўваць нячыстыя сродкі , каб
знішчыць найгоршых з палачоў і, такім чынам, выратаваць некаторых з вязняў і зрабіць
нешта для падрыхтоўкі мяцяжа.
Першая пазіцыя прадугледжвае, што чалавек выбірае
евангельскую практыку самаачышчэння, самаахвяравання і братэрскай любові. Такая пазіцыя
апраўдана з улікам пэўных абставінаў ці асаблівага паклікання некаторых людзей. Іншая
пазіцыя, прадугледжвае тое, што мэта апраўдвае сродкі і Бога зусім не існуе. Вось
так апісаў свой вопыт прыбывання ў канцэнтрацыйным лагеры французскі пісьменнік Давід
Руссэ: “У цябе не можа быць маральных прынцыпаў, якія граюць ролю суддзі, што аддзяляе
адзін ад аднаго дрэнныя і добрыя сродкі, калі ты разглядаеш гэтыя прынцыпы па-за іх
гістарычнай і сацыяльнай адноснасцю”. Іншымі словамі, пісьменнік лічыў, што нельга
шукаць фундамент сваіх прынцыпаў у тым, што стаіць па-за чалавечай прыродай, гэта
значыць у Богу, але заўсёды дзейнічаць “па-сітуацыі”. Такім чынам, таму, хто прымае
такую пазіцыю, нічога не застаецца, як самаму разбэсціцца, праз поўную адаптацыю да
разбэшчанага асяроддзя.
Ітак. Што мы бачым? Першая пазіцыя неразумна ў якасці
нормы, а другая памылковая сама па сабе. Дзе ў такім выпадку адказ? Гэты адказ ставіць
нас перад абліччам самай цяжкай праблемы ў маральным жыцці і той сумнай заканамернасцю,
згодна з якой ужыванне маральных нормаў, прымае ўсё больш нізкія формы ў сувязі з
дэградацыяй сацыяльнага асяроддзя. Гэта значыць, маральныя прынцыпы, хоць і з’яўляюцца
незменнымі, але ў жыцці грамадства набываюць абмежаванае, больш нізкае значэнне.